Тыва дыл – чоннуң өнчүзү

Тыва Республиканың күрүне дылы, тыва чоннуң культурлуг болгаш сагыш-сеткил өнчү-байлааның чарылбас кезээ болур тыва дылды кадагалап, деткип база сайзырадыры-биле чылдың-на ноябрь 1-де Тыва дылдың хүнүн демдеглеп эрттирерин доктаадыр деп, Тыва дыл хүнүнүң дугайында чарлыкта тайылбырлаан. 

Республиканың кожуун, суурларында өөредилге, культура болгаш эртем албан черлеринге тыва дылды сайзырадырынче, байлакшыдарынче болгаш чугаа культуразын бедидеринче угланган хемчеглерни ол хүнге тураскаадып эрттирери чаңчылчаан.

 Бо чылын өөредилге организацияларынга “Үш ыдык” деп диктант бижииринге республика мөөрейи, тыва дылга олимпиадалар, Тываның күрүне университединиң студентилер ортузунга “Тыва дылда алгап тур бис” уран номчулга мөөрейи, тыва дылче уран очулга ажылдарынга “Онзагай очулга” мөөрей, Тываның Улустуң чогаалчызы К.К. Кудажының 90 харлаанынга “Сат номчулгалары” эртем-практиктиг конференция, Тыва Республиканың эртеминиң алдарлыг ажылдакчызы, филология эртемнериниң доктору Б.И. Татаринцевтиң 80 харлаанынга тураскааткан “төгерик столда” эртемденниң тургусканы “Тыва дылдың этимологтуг словарының” 5-ки томунуң таныштырылгазы дээш, өске-даа хемчеглер хөйнүң кичээнгейин хаара тудар. 

Ноябрь 1-де – Тыва дыл хүнүнде, Улусчу чогаадылга бажыңынга, “Тыва дыл – чоннуң өнчүзү” деп IV республика шуулганы тыва дылдың шинчилекчилериниң, эртемденнерниң, чогаалчыларның, башкыларның, студентилерниң, культура ажылдакчыларының, журналистерниң киржилгези-биле эртер.