Тываның Баштыңы, октябрь 11-де, республиканың ажыл-ишчилеринге күрүне шаңналдарын тывыскан

Ол хүн Тываның В. Көк-оол аттыг Национал хөгжүм-шии театрынга байырлыг хемчег болган. Тываның Баштыңы Шолбан Кара-оол биле ТР-ниң Дээди Хуралының даргазы Каң-оол Даваа ажыл-ишчи кижилерге күрүне шаңналдарын тывыскан. 

 Тыва Республиканың “Шылгараңгай күш-ажыл дээш” деп медалы-биле республиканың хөгжүлдезинге хөй чылдарда киирген үлүг-хуузу дээш, көдээ ажыл-агый адырының Хоочуннар чөвүлелиниң даргазы, ТР-ниң алдарлыг ажылдакчызы Бадарчы Сенгиевич Седейни, Тыва Республиканың Чазааның чанында Тываның гуманитарлыг болгаш социал-экономиктиг тускай шинчилелдер институдунуң төөгү секторунуң кол эртем ажылдакчызы, төөгү эртеминиң доктору Николай Михайлович Моллеровту шаңнаан. 

“Буян-Бадыргы” ордениниң III чадазынга Тываның күрүне университединиң география болгаш туризм кафедразының профессору, Тыва эртем төвүнүң кол эртем ажылдакчызы, Россия Федерациязының дээди профессионал өөредилгезиниң хүндүлүг ажылдакчызы, география эртемнериниң доктору Светлана Сюрюновна Курбатская; күш-ажылдың болгаш тыва журналистиканың хоочуну Владимир Никандрович Савиных база “Тывамедиабөлүк” үндүрүлге бажыңының “Тувинская правда” солуннуң кол редактору Роман Всеволодович Тас-оол олар төлептиг болганнар. 

“Тыва чоннуң чоргааралы” деп күрүне шаңналын республиканың социал-экономиказының, культуразының сайзыралынга киирген үлүг-хуузу дээш, “Шылгараңгай күш-ажыл” Тыва Республика медалының, Тыва Республика ордениниң, «Буян-Бадыргы» орденниң III чергезиниң эдилекчизи, Социалистиг күш-ажылдың маадыры Иван Васильевич Чучевке база Тываның Национал хөгжүм-шии театрының артизи, Россия Федерациязының алдарлыг артизи, Тываның улустуң артизи Анна Оюновна Шириин-оолга тывыскан.