«Чаңгыс демниг Россия» баш бурунгаар бадылаашкынның түңнелдерин үндүрген

Июнь төнчүзүнде болуп эртер регион конференциязында боттарын идип үндүргеннерниң төнчү даңзызын бадылаарын регион салбыры дыңнаткан. 

Республика парламентизиниң 32 депутат мандадынче партия кежигүннери база талалакчылары болур 96 кижи, а муниципалдыг тургузуглар хуралдарының 666 мандадынче 2300 кижи кордаан. Олар шупту праймериз чорудуун эрткен. 35 хар чедир назылыг 60 кижиниң тозу күскү соңгулдаларда депутатче соңгудар эрге дээш демиселди уламчылаар.  

«Кандыг-бир чүүлдү кылырының орнунга, ону аазаары белен дээрзин шупту билир бис. Бистиң чаңгыс чер-чурттугларывыска ажыл-ишчи кижилерниң төлээлери херек. Регион парламентизиниң депутадынче удавас соңгудар кандидаттар эртен дораан чон-биле ужуражып, оларның чагыгларын хүлээп, айтырыгларын шиитпирлеп эгелээр” – деп, Тыва Республиканың Дээди Хуралының даргазы, «Чаңгыс демниг Россия» бүгү-российжи партияның Тывада регион салбырының секретары Каң-оол Даваа чугаалаан.  

«Чаңгыс демниг Россия» бодунуң иштинде кандидаттар ортузунда шилилдени чорудуп турар чуртта чүгле чаңгыс партия болуп турарын сагындыраал. Эрткен улуг-хүнде, майның 26-да, партия баш бурунгаар бадылаашкынны эрттирген. 

 Алтынай Чимит, tmgnews