Тываның Баштыңы часкы хову ажылдарын дүргедедирин чер ажыл-агыйларындан негээн

Тарылга кампаниязын үскен шупту удуртукчуларга онааштыр чугаа аңгы болурун республика баштыңы сагындырган. «Көдээ ажыл-агый бүдүрүкчүлеринге чымыштыг үе эгелээн – деп, Шолбан Кара-оол демдеглээш, Тываның чер ажылдыгларын сагындырган. – Республикада часкы хову ажылдары кидин түлүк чоруп, харыысалгалыг үе дүшкен. Чүнү тарып алыр сен, ону чиир апаар”. 

Чазактың талазындан бүгү талалыг ажылдарны чоруткан, деп Тываның Баштыңы сагындырган. «Чер ажылдыгларга акша-төгерикти үлээн, чиигелделиг өртек-биле кывар-чаар материалдарны тускайлаан. Үе кызып келген, ынчангаш көдээ ажыл-агыйлары технологияларны сагып, ажылды үезинде доозар херек” – деп, Шолбан Кара-оол демдеглээн.  

Кожуун хуралдары часкы хову ажылдарының түңнелдери-биле ооң эрткенин сайгарып, кампанияның чедер, четпестерин илередир ужурлуг деп, республика удуртукчузу айыткан. «Бир эвес хуусаа болгаш технологиялар сагыттынмаан болза, кожуун чагырга даргаларының чер ажылын харыылап турар оралакчыларының ажыл-албанынга тааржырының дугайында айтырыгны тургузар апаар” – деп, Шолбан Кара-оол демдеглээн.