Тываның Баштыңы Шолбан Кара-оол «Национал төлевилелдер – боттаныышкын чадазында» шуулганга киришкен

«Дмитрий Анатольевичиниң удуртулгазында коллегалар-биле кады, президентиниң национал төлевилелдерин күүседиринге «шактарны шүүштүрдүвүс». Күрүне программаларынга деңнээрге, национал төлевилелдер кижилерниң чаагай чоруун бедидеринче чиге угланган. Кижи бүрүзүнүң амыдырал-чуртталгазынга дорт хамаарылгалыг! Социал адырны өрү тырттар онзагай арганы ажыглаар ужурлуг бис! Күрүне деткимчезин хуваап тура, Тываны хөгжүдериниң онзагай талаларын өөренип көөр кылдыр федералдыг яамыларга шынзыдар» - деп, Шолбан Кара-оол бодунуң ажылының дугайында соцчеткилерге шуулган үезинде бижээн. 

Тыва 67 федералдыг төлевилелдиң 46-зында киржип турарын сагындыраалыңар. 24 төлевилелге элээн акшаландырыышкынны камгалап алганын республика баштыңы дыңнаткан. Тыва 2021 чылга чедир 7 млрд рубль ажыг федералдыг субсидияларны алыр. Шуулганда регион төлевилелдерин боттандырарының аргаларын, российжи сайыттар-биле кады ажылдажылганы чугаалашкан.

Президентиниң «май» чарлыктарын күүседири-биле, РФ-тиң Чазаа «Демография», «Кадык камгалалы», «Өөредилге», «Чурттаар оран-сава болгаш хоорай хүрээлели», «Экология», «Айыыл чок болгаш шынарлыг автомобиль оруктары», «Күш-ажылдың бүдүрүкчүлүү болгаш ажылга хаара тударын деткиири», «Эртем», «Биче база ортумак сайгарлыкчы чорук болгаш сайгарлыкчы эгелээшкинни деткиири», «Делегей кооперациязы болгаш экспорт», «Чурагайлыг экономика», «Культура» деп 12 национал төлевилелдерни ажылдап кылгаш, паспорттарын бадылаанын сагындыраал.