РФ-тиң Чазааның даргазы Дмитрий Медведевке эрткен хуралдың түңнелдеринге хамаарыштыр хөделиишкиннерни дүрген ажылдап кылыр даалганы Тываның Баштыңы чазакка берген

Марттың 27-де, РФ-тиң Чазааның даргазы Д.А. Медведевке, Тываның социал-экономиктиг хөгжүлдезиниң талазы-биле хурал болуп эрткен. РФ-тиң экономиктиг хөгжүлде яамызы биле регион чазаанга – 2025 чылга чедир Тыва Республиканың социал-экономиктиг хөгжүлдезин дүргедедир комплекстиг хемчеглер дугайында РФ-тиң Чазааның айтыышкын төлевилелин ажылдап кылыр айтыышкынны берген болгаш, республика чазаанда чымыштыг ажыл эгелээн деп, Тываның Баштыңы Шолбан Кара-оол аппарат хуралында демдеглээн. 

Тываның Баштыңы хемчеглер бөлүүнче санал-оналдарны ажылдаар ажылчын бөлүктү хөй-ниити төлээлерин хаара тудуп тургузар дугайында айтыышкынны берген.

 РФ-тиң Экономиктиг хөгжүлде яамызының удуртулгазы регион чазаа-биле ажылчын бөлүктерни тургузар деп шиитпирни хүлээп алган. Шолбан Кара-оол адырларның федералдыг яамылар кураторлары-биле кады ажылдап, федералдыг органнарның киржилгези-биле РФ-тиң экономиктиг хөгжүлде сайыды М.С. Орешкинниң удуртканы үнүүшкүннүг хуралды республикага эрттирерин белеткээр даалганы берген.  

«Болган хуралдың ужур-утказы дыка улуг. Федералдыг сайыттарга Тывага хамаарыштыр боттарының планнарын дүрген тургузар дээн негелде шыңгыы, регионда байдалга бодамчалыг арга, хемчеглер херек – бистиң республикага сеткилинден дузалажыр дээни дээш Чазак даргазы Дмитрий Анатольевичиге четтирдим – деп, Тываның Баштыңы Шолбан Кара-оол апрель 3-те, средада эрткен аппарат хуралында демдеглээн. – Ам бистен хамааржыр. Тываның чаагай чоруу дээш берген идегелди кайы хире ажыглаарывыстан. Инициативалар, тодаргай ажыл-херектер херек. Үе дыка кызыы. Ийи ажыг неделя бар. Федералдыг адырлар кураторлары-биле кады ажылдап турарларны аналитиктиг материалдар-биле хандырар херек.