06.03.2019
Төп шериг округунуң транспорт полугунуң Кызылда авиация эскадрильязы март 1-де ажылдап эгелээн. Чүге эскадрильяны тургусканыл, кандыг даалгалар күүседирил? Төп шериг округунуң каттышкан авиация эскадрильязының командири, подполковник Зафар Пиров "Тува 24" телеканалдың студиязынга ол айтырыгларга харыыларны берген.
- Эскадрильяны кажан хевирлеп эгелээнил, амгы үеде ол кандыг байдалда?
Зафар Пиров: «Кызыл» аэродромунга ооң байырлыг ажыдыышкыны эртти. Ийи чыл бурунгаар комплектилеп эгелээн турган. Баштай шериг комендатуразын тургускаш, оон чиңгине штабтың начальнигиниң директивиниң чөпшээрели-биле ооң баазазынга авиация эскадрильязы тургустунган.
- Авиация эскадрильязының составында кандыг техника кирип турарыл?
Зафар Пиров: АН-26 транспорт самолеттары биле МИ-8 АМТШ-В десант-траспорт вертолеттары ында кирген.
- Кандыг даалгалар кылырыл?
Зафар Пиров: 55-ки даг мото-адыгжы бригаданың дайынчы белеткелин хандырар, дилээшкин-камгалал ажылдарын чорудар, космиктиг аппараттарны ужударын база хондурарын хайгаараар, онза байдалдарны чайладыр даалгалар дээш, авиация ажыглаар өске-даа даалгаларны күүседир. Санитарлыг рейстерни база кылыр.
- Тываның девискээринде, ийи дугаар чылда, шериг раллилер чадалары эртип турар. Бисте шериг эскадрильязы тургустунган болганда, ындыг хевирлиг оюннар болур бе? Бүгү-армейжи оюннар чорудуу-биле.
Зафар Пиров: Авиация деңнелинде армейжи оюннар эрттирериниң дугайында чугаалап шыдавас мен, а дайынчы оюннарда авиация хандырылгазынга албан киржир бис.
- Ам бирги ужудуушкун кажан болурул, ону көрүп болур бе?
Зафар Пиров: Кызыл хоорайның аэропортунда бактааттынган бис. Агаар делгеми улуг ышкаш сагындырар, херек кырында ол ындыг эвес. Эң баштайында пассажирлерниң айыыл чок чоруу чугула. Аэропорттуң удуртулгазы-биле кады ол айтырыгларны өөренип көрүп тур бис. Келир неделяда, 14-15 хүннеринде, ол айтырыгны кады чедиишкинниг күүседиптер боор бис. Ынчангаш марттың 14-15-те бирги ээлчегни планнадывыс. Кады ажылдап турарывыс Тываның орук-транспорт яамызынга, ооң удуртукчузу Бады Олег Ооржаковичиге четтиргенивисти илереттивис.
- Хевирлээшкин ажылын-на кады чорудуп турган болгай силер. Тиилелге чыскаалынга киржир силер бе?
Зафар Пиров: Тиилелге чыскаалы — бистиң чонувустуң ыдык байырлалы. Аңаа албан киржир бис. Авиация парады болур, болбазын амдыызында билбейн тур мен, ындыг-даа болза эскадрильяның хуу составы чыскаалга киржири шын. Чүге дээрге, бүгү чоннуң байырлалы-дыр. 55-ки бригада, "Юнармия", кадет корпузу-биле, шупту байырлалга киржир бис, ынчан чонувустуң маадырлыг чоруу кажан-даа уттундурбас.
Арзу Садыгов чугаалашкан