Тываның Баштыңы федералдыг төлевилелдерге база түреңги чорукту эвээжедир айтыкчыга шыңгыы хыналданы тургузарын негээн

«2019 чылда чагыгларывысты камгалаарын үезинде доостувус – деп, Шолбан Кара-оол бодунуң блогунда бижээн. – Федералдыг чазак-биле барык шупту дугуржулгаларда ат салдынган. Национал төлевилелдер күүселдезинче ниитизи-биле 3,4 млрд. рубльди алыр бис». Республика 3 393,5 млн. рубль ниити түңнүг 36 субсидия база бюджеттер аразының 6 трансфертинче кордаан дугуржулгаларны 14 федералдыг эрге-чагырга органнары-биле чарар турганын Тываның Баштыңы демдеглээн. Ооң чугаазы-биле алырга, амгы үеде 51 дугуржулга чардынган, «Айыыл чок болгаш шынарлыг автомобиль оруктары» национал төлевилелди боттандырар чүгле чаңгыс дугуржулгага март 1-ге чедир атты салыптар. «Ажылдарны үезинде кылыпкан бис – деп, Шолбан Кара-оол демдеглээн. – Национал төлевилелдер күүселдезин онза контарольга алырын негедим. 

Республика ону боттандырарынга шупту трансферттерниң 54 хуузун алыр, а Президентиниң май Чарлыктары езугаар дугуржулгаларда айыттынган тускай сорулгалыг көргүзүглер үре-түңнелдиң көргүзүглери болур».

 Трансферлерни үлээр негелделер эң шыңгыы дээрзин Тываның Баштыңы демдеглээн. «Чогуур үре-түңнелди бербес болза, акшаны эгидер – деп, Шолбан Кара-оол чугаалаан. – Ындыг деңнелче шуут бадып болбас! Дугуржулгаларда айыттынган тускай сорулгалыг көргүзүглерни чедип алыр дээш, ажылдаар. Ынчангаш төлевилелдер талазы-биле ажылды шыңгыы контрольдаар бис».  

Тываның Баштыңы национал төлевилелдер күүселдезиниң түңнелдерин квартал санында анализтээрин чазактан негээн. «Чазак даргазының оралакчыларының деңнелинге – ай санында, а бичии-ле кылдынмайн турар чүүлдер бар болза, ол талазы-биле доктаамал ажылдаар» – деп, Шолбан Кара-оол чугаалаан. 

Республиканың удуртукчузу ядыы-түреңги чорук айтыкчыларынга онза контрольду тургузарын негээн. «Февраль 27-де болуп эртер Күрүне чөвүлелиниң хуралында амыдырал-чуртталганың шынарынга чаңгыс аай көргүзүг – назынның узунун сайгарып чугаалажыр бис. Ынчангаш хамаатыларның орулгалары база ядыы-түреңги чорукту чавызадыр хемчеглер талазы-биле чазактың аңгы хуралын белеткеп, эрттирер даалганы аппаратка берип тур мен» – деп, Шолбан Кара-оол чугаалаан.