Тывада грипп талазы-биле эпидемиологтуг байдал ажырбас

Неделя иштинде 10 муң кижиге онааштыр 25,8 көргүзүглүг, 1207 аарыг демдеглеттинген. Ооң 87 хуузунда бичии уруглар аараан. Лаборатория 13 таварылганы халдавырлыг грипп деп бадыткаан, ооң 9-зу А H3N2 хевирниң база 3-ү - Аpdm H1N1 хевирниң гриви, ынчап кээрге грипп талазы-биле эпидемиологтуг байдал ындыг. Тывада ниитизи-биле эпидбайдал амдыызында нормада.  

Тыва Республиканың Кадык камгалал яамызының штаб хуралында, Росхереглел хайгааралының Тыва Республикада эргелелиниң специалистери-биле бүгү чуртта грипп аарыының байдалын база аарыг-биле демиселдиң дугайында сайгарып чугаалашкан. Грипптиң А база В халдавырындан аарыыр чорук Европа регионнарында көвүдээнин дыңнаткан. 

Россия Федерациязын алырга, Төп регионда эпидемиологтуг байдал - 41,3 хуу, Урал федералдыг округда - 38,5 хуу, Ыраккы чөөн чүк федералдыг округда – 62 хуу четкен. Сибирь федералдыг округда: Красноярскда - 26,7 хуу, Новосибирскиде 18,1 хуу, Улан-Удэде – 33,7 хуу, Барнаулда – 36,8 хуу, Кемеровода – 79,7 хуу көдүрлүүшкүннүг.  

Штаб хуралында грипп халдавырынга удур чурумну күштелдирер дугайында шиитпир хүлээп алдынган: эмнелге, өөредилге, назы четпээн уруглар база социал албан черлеринге, ол ышкаш коллективтерге маска чурумун шыңгыы сагыыр, вируска удур эмнерниң курлавырын контрольга алыр. 

Февраль 4 база 5-те, байырлал дыштаныр хүннеринде, дежурствону организастаар, аарыгга мониторингини чорудар, Дүрген эмчи дузазының төвүнге немей ийи бригаданы быжыглаар.