Тываның Баштыңының саналдааны езугаар, кадык камгалал яамызы спортчуларга эмчи-биологтуг хандырылганы чедирерин хүлээнген

Республика Баштыңы Шолбан Кара-оолдуң, бедик класстың спортчуларын белеткээрде эмчи-биологтуг хандырылга кирген амгы үениң системазын тургузары чугула деп, чаңгыс эвес удаа чугаалааны санал езугаар, эдилгени хоойлуже киирген.  

Тываның чыынды команда спортчуларының кадыкшылын болгаш ажылдап шыдаарын катап эгидеринче угланган хемчеглер комплекизинде эмчи-биологтуг хандырылга киргенин хоойлу-биле быжыглаан. Ынаар эмнээшкин, психологтуг хемчеглер, эмчиниң доктаамал хайгааралы, эмнер, эмнээшкинге херек чүүлдер база тускай чемнер-биле хандырылга кирер ужурлуг. 

Оон аңгыда, ТР-ниң Кадык камгалал яамызы спортчу медицина адырында эртем шинчилелдерин организастап, ону эрттиреринче кичээнгейни углаар. Хоойлу ведомствонуң мурнунга, регион деңнелинге допингиге удур контроль системазын тургузар, допингиге удур хоойлужудулганы ажылдадыр, спортчулар хоруглуг эмнерни болгаш биостимуляторларны ажыглаарын болдурбас ачы-дузалар көргүзер сорулганы салган.

Шолбан Кара-оол Тыва чурттуг, москвачы эмчи Артыш Ондарның тургузушканы «Победа» хуу ачы-дуза фондунуң дузазы-биле ындыг албанны тургузарын ооң мурнунда оралдашкан. Республика Баштыңы эмчи-биле ужуражып, төлевилелди холга алырын саналдап, боду ону деткиирин аазаан. «Победа» фондузу ышкаш организациялар-биле эрге-чагырга кады ажылдап болур эдилгени хоойлуда киирген.  

Спорттуң эң-не айыылдыг хевирлери - спортчу хүрештер талазы-биле Тыва улуг чедиишкиннерни чедип алганын демдеглезе чогуур. Оларның аразында хостуг хүреш, самбо, дзюдо, бокс, кикбоксинг болгаш өске-даа хевирлер бар. Амгы үеде тыва школаның 70 хире мөгелери Россияның чыынды командаларында кирген. Спортчу медицинаны тургузуп, ону хөгжүдүп алыр болза, профессионал спортта хаара туттунган республикада аныяк кижилерниң саны каш катап көвүдеп, улуг спортта оларның депшилгези чырык болгаш үргүлчүлелдиг апаар деп, Шолбан Кара-оол санап турар.