Тываның Баштыңы Спорт яамызындан спортчу ажыл-агый удуртулгазының чаа технологияларын чедип алырын кыйгырган

Тываның Баштыңы Шолбан Кара-оол чаарттынган Спорт яамызын спортчу ажыл-агыйны удуртурунуң шынарлыг чаа хевирин тургуспушаан, чүгле массалыг-хөглээшкинниг чорудулгаларга кызыгаарлаттынмазын кыйгырган. 

«Бөгүн, Тывада, спортту чаа, элээн бедик деңнелче көдүрер дизе, чүгле талантылыг тренерлер база салым-чаяанныг оолдарлыг болуп, спортзалдар, бассейннер база футбол шөлдерин тудары эвес-тир, – деп, Шолбан Кара-оол чугаалаан. – Спортчу ажыл-агыйны удуртурунуң шынарлыг чаа хевирин тургузар херек».  

Спорт яамызы чаа үениң специалистерин белеткеп база өөредириниң чорудуун шуудадып, уругларның спорт школаларының база бүгү спортчу инфрастуруктураның чиге ажылын тургузуп, бүрүн күжү-биле ажылдаарын хандырар херек, деп республика удуртукчузу демдеглээн. 

«Кым-даа база чүү-даа, анаа-ла турбас кылдыр, ажылды угландырар херек – деп, Шолбан Кара-оол демдеглээн. – Чаарттынган спорт яамызы кандыг-бир турнир эрттирер ийикпе азы шаңналче бюджет акшазын чарыгдаарынче сагыш салган массалыг хөглээшкиннер эрттирери-биле кызыгаарлаттынмас ужурлуг». 

Спорт яамызынга спортчу амыдыралдың бүгү деңнелдерин билир болгаш шуптузун хаара тудуптар билдилиг менеджмен херегин Тываның Баштыңы онзалап айыткан. Уруглар секцияларынче чаштарны хаара тударындан эгелээш, хуу фитнес-клубтарны деткип, спортчуларның эмчи үделгезиниң системазын тургузуп, улуг болгаш профессионал спорт институттарынче шылгараңгайларны шилип, оларны олимпийжи бедиктерже өрү көдүрер дээш ажылдаар ужурлуг. Ол бүгү ажылдарны чиге тургузуп, тодаргай, билдингир база төнчү үре-түңнелге айтырын республика баштыңы чагаан.

 «Спортту удуртуру, суббота биле улуг-хүнде чонну хаара тударының айтырыы эвес-тир. Ол дээрге, тудуг база чер ажыл-агыйы ышкаш, харын-даа оон-даа берге, боду чиге айтырыгларлыг бүдүн технология-дыр» - деп, Шолбан Кара-оол Спорт яамызының чаа баштыңынга база спортчу организацияларының удуртукчуларынга чагаан.