Тыва таарымчалыг хоорай хүрээлелин хевирлээр программаны уламчылаарынга федералдыг бюджеттен 97 млн. рубльди 2019 чылда алыр

Төлевилелдиң онзагайы – бодунуң хоорай, суурларын чаагайжыдарынга чурттакчылар боттары албан киржир ужурлуг. Ынчалдыр чурттакчылар кайы девискээрлерни, канчаар чаагайжыдарын, каяа чүнү тударын тодарадырлар.  

Республика төлевилелди боттандырып эгелээн бирги чылындан-на киржип турарын, ТР-ниң Тудуг яамызы дыңнаткан. Бо үе дургузунда 60 объектини чаагайжыткан. Чүгле 2018 чылда он муниципалдыг тургузугларда бажың чанының 16 шөлдерин, 12 хөй-ниити территорияларын база 2 хоорай парыгын септээн. Федералдыг бюджеттен ол сорулгага 68,7 млн. рубльди, республика бюджединден - 3,6 млн. рубльди тускайлаан. Муниципалитеттер боттары боттарының үлүүн киириштиргеннер. 

Бажыңнар чанының кижи кылаштаар черлерин септеп, сандайдар болгаш бок төгер саваларны тургузуп, чырык системазын эде чаартыр ажылдар ынаар кирген. Кызыл, Чадаана хоорайларда база Хову-Аксы суурда хөй-ниити девискээрлериниң талазы-биле элээн улуг төлевилелдерни кылган. Республика найысылалында «Ангарский» сесерликти, Хову-Аксында «Хадыңның аяң» сесерликти, в Чадаанада Алдар аллеязын туткан.

 Республика Баштыңы Шолбан Кара-оол чаагайжыдылга планнарын турзузарынга чурттакчылар идепкейлиг болурун кыйгырган. «Чараш черге чурттап тургаш, сагыш-сеткил оон-даа чараш чүүлдү дилээр. Чурттап турар хоорайыңны, бажың чанының девискээрин эки, чараш, таарымчалыг кылдыр кылыксаары чөп. Президентиниң национал төлевилели-биле бистиң хоорайларывысты чаагайжыдарын 2019 чылда ам-даа уламчылаар бис. Чүгле федералдыг бюджет шугуму-биле ол сорулгага 100 хире млн. рубльди камгалап алган болгаш, аргаларывыс оон-даа көвүдээн. Ынчап кээрге, төлевилел шилилдезинге киржиңер чаңгыс чер-чурттуглар. Боттарыңар санал-оналдарыңарны киирип, хажыызынга артпайн, оларны камгалаңар. Программага бо чылын эвес-даа болза, келир чылын кириңер» - деп, Чазак даргазы бодунуң блогунда бижээн.