28.11.2018
Тываның Баштыңы Шолбан Кара-оол телефоннар база смартфоннар оорлаарының багай уржуун өөреникчилерге болгаш студентилерге тайылбырлаарын республиканың өөредилге албан черлериниң директорлары болгаш башкыларынга онааган.
Тывада бөгүнде бүрүткеттинген эт-хөреңги оорлаанының барык чартыы ындыг оор чорукка хамааржыр, а ооң уржуктары кандыг салдарлыг болурун аныяктар билбес деп, республика удуртукчузу чугаалаан.
«Телефон оорлаары – уругларның опчок чоруу эвес, а аар кем-херек-тир деп, уругларывыска тода болгаш билдингир кылдыр тайылбырлаар ужурлуг бис. Амгы үеде телефоннар болгаш смартфоннар өртээ 10 муң рубльдан эвээш эвес, ынчап кээрге ону оорлаар болза, хоойлу-биле чеди чылда хосталгазын казыттырып болур» – деп, Шолбан Кара-оол демдеглээн. Амгы үеде ындыг кем-херектерни дыка дораан илередиптер, оорлаттынган телефон кайда чоруп турарын техниктиг аргалар-биле дораан тыптар апарган деп, республика баштыңы чугаалаан.
«Аныяк кижи ындыг кем-херекти кылгаш, амыдарылда эки чүве чедип алыр дыка хөй аргаларын чидириптерин аныяктарга угаадыр херек – деп, Шолбан Кара-оол айыткан. – Үүлгедиг соонда, дээди эртем-билиг чедип алыры, ажыл-агыйга депшиири болдунмас, шериг албанынче, корум-чурум камгалаар органнарже база күрүне структураларынче кирдинмес. Класс удуртукчу башкылары база педагогтар ооң дугайында уругларга тайылбаар ужурлуг».
Тываның Баштыңының бодалы-биле алырга, телефоннар болгаш смартфоннар оорлаанының уржуктарын тайылбырлаар кампанияны кожуун чагыргалары, сумулар баштыңнары, школа директорлары болгаш башкылар контрольга алыр. Республикада өнчү кем-херектериниң 48 хуузу ындыг кем-херек үүлгедиглеринге хамааржыр.
Эрткен неделяда, кем-херек үүлгедиишкиннери-биле демиселге тураскааткан республика конференциязында, Иштики херектер яамызы кем-херектерниң саны ниитизи-биле эвээжээнин айыткан, ынчангаш Тываның Баштыңы Шолбан Кара-оол тайылбыр ажылын күштелдирер болза, ол эки түңнелдерни бээринге бүзүрелдиг. «Мен бодаарымга, ында чиге харылзаа бар, ол дыка эки көргүзүг – деп, Шолбан Кара-оол демдеглээн. – Кем-херек үүлгедиишкининге, чажыт арага садыглаашкынынга, ылаңгыя назы четпээннер ортузунда корум-чурум үрээшкиннеринге удур чаңгыс фронт-биле туржур дээн ниитилелдиң негелдези бар бооп турар. Конференцияның түңнелдерин шинчилеп, кошпушаан, оон Тываның сагыш-сеткил хөгжүлде-сайзыралының концепциязы апаар стратегтиг документини ажылдап кылыр».