Шолбан Кара-оол: Тыва аварийлиг бажыңнардан өскээр көжүрер программа талазы-биле эки арга-дуржулганы чыып алган бис

«2015 чылдың планын багай күүсеткени дээш республикага 200 млн. рубль торгаалды онаар турган. Ындыг болзажок, сайыт Владимир Владимирович Якушевке 2007 чылда республиканың тудуг адыры чүгле 26 муң дөрбелчин метр чуртталга шөлүн киирген турганын тайылбырладым. Ам ол сан-чурагай ындыг эвес, чүгле чаңгыс өскээр көжүрер программа-биле безин чылда 60 муң дөрбелчин метрни дужаап турар бис. Республиканың тудуг адыры ынчангызы ышкаш эвес, өске деңнелде келгенин бадыткаан» – деп, Шолбан Кара-оол дыңнаткан.  

Чаа-ла эгелээн ол программага республика 38 хуузун кады акшаландырар, ынчан бир дөрбелчин метрде 28 муң рубль турганын, Тываның Баштыңы сагындырган. Ол үеде Тывада эрги бажыңнарның өртээ дөрбелчин метрде 45 муң рубль чедип турган. «Тудуг компаниялары ол конкурстарга санаашкынныг кээр болгаш, тудуг конкурстары бо-ла эртпейн баар турду» – деп, Шолбан Кара-оол демдеглээн.  

Ооң-биле чергелештир, ону кылып шыдаар бис дээн компаниялар тыптып келген. «Тывага көстүп келген краснояржы, абаканчы компаниялар кеземче херектериниң киржикчилери апарган – деп, Тываның Баштыңы сагындырган. – Чарган керээзин күүседип шыдаваан ындыгларның бирээзинге «Вертикаль» КХН хамааржыр, бөгүн элээн шыңгыы истелге чоруп турар». 

Тываның Баштыңы Шолбан Кара-оолдуң бодалы-биле алырга, өске талазында, Дмитрий Крапивинның тудуг компаниязы дээн ышкаш республикада тус черниң эки үлегерлиг организациялары тыптып келгени эки.