Тываның Баштыңы Шолбан Кара-оол Россияның транспорт сайыды Евгений Дитрих-биле чугаалашканының түңнели

 Россияның транспорт сайыды российжи регионнар удуртукчулары-биле ужуражылгада ындыг чүүлдү чугаалаанын Тываның Баштыңы Шолбан Кара-оол дыңнаткан. Келир чылдың февральда Москва – Кызыл маршруттуг авиаужудуушкунну катап эгелээрин, субсидия бээрин федералдыг эрге-чагырга органнары-биле дугуржуп алганын чугаалаан.

«Транспорт сайыдының регионнар губернаторлары-биле ужуражылгазында бодумнуң барымдааларывысты чугааладым. Сайыт Евгений Иванович Дитрих республикага эки хамаарылгалыг-дыр» – деп, Шолбан Кара-оол бодунуң блогунда бижээн. 

Россияның транспорт сайыды-биле хуралда Улуг-Хемни кежир көвүрүг тудуун, хоорайже ооң кирер дөрт дилиндектиг оруун доозар дугайында чугаа кол инициативам болган деп, республика удуртукчузу демдеглээн. «Ол, эвээш дизе, 300 млн рубль инвестициялар-дыр» – деп, ону Россияның транспорт сайыды деткээнин Шолбан Кара-оол айыткан. 

«Кызыл хоорайже кирер орук» 5,032 км хемчээлдиг автоорукту эде чаартыптар болза, оң биле солагай эриктер аразында көвүрүглеп хүнде 14 муң хире машинаны эрттирер арганы тургузар. Автоорук Кызылдың кирер кол оруктарында транспорт шимчээшкинин өскээр угландырар.  

2020 чылда 600 млн. ажыг рубльди аңгылап бээринге үндезинни айыткан төлевилел документациязының белеткелин келир чылын доозары планнаттынганын республиканың удуртукчузу демдеглээн. Ооң чугаазы-биле алырга, ол бүгүнү Хандагайты каайлы пунктузун эде чаартырынче үндүрер. 

Москва – Кызыл авиарейске субсидия алыр дугайында шагда-ла чорудуп келген чугаа келир чылдың февральда катап эгелээр шиитпирни хүлээп алганы бир эки чедиишкин. Эрзинге чедир авто-орукту федералдыг деңнелче дамчыдарынга элээн эки аргалар тыптып келгенин республика баштыңы чугаалаан. Регионнар аразының база делегейниң чаа транспорт коридорун тургускаш, Сибирьниң экспорт курлавырын улгаттырар чидиг айтырыгны чоокта чаа сайгарып көрген РФ-тиң субъектилериниң экономиктиг кады ажылдажылгазының «Сибирь дугуржулгазы» регионнар аразының ассоциациязы инициативаны деткээн.

 «Ам Ак-Довурак-Абаза оруу дээш ажылдаар бис – деп, Шолбан Кара-оол чугаалаан. – Ол орукта чүгле озал-ондактыг байдалдыг алдыдан эвээш эвес көвүрүг кежиглери бар. Мурнувуста улуг ажылдар манап турар!»