Тываның Баштыңы биле «Енисей» орук эргелели ФКА-ның начальниги Р-257 оруктуң берге участоктарынга капитал септелгени кылырын дугурушкан

Тываның Баштыңы Шолбан Кара-оол «Енисей» орук эргелели федералдыг казна албанының начальниги Сергей Аникин-биле ужурашкан. Олар эрткен чылдың түңнелдерин үндүрүп, келир чылдың планнарын сайгарган. 

Росавтооруктуң адаанда ведомство - «Енисей» орук эргелели федералдыг казна албан чери 2018 чылда, республика девискээринде «Енисей» Р-257 федералдыг оруктуң ниитизи-биле 24 км узун хемчээлдиг дөрт участогунга септелге ажылдарын чоруткан, деп Сергей Аникин чугаалаан. Ол дээрге, Тыва Республиканың Кызылче оруктуң (851-859 км), Улуг-Хемде (936–940 км), Чаа-Хөлде (963 –968 км) база Өвүрде (1070- 1076 км) кезээ-дир.  

Септелге үезинде орукту быжыг сай-мастик асфальт-бетону-биле шып, суг агар черлерни чаартып, оруктар кыдыын быжыглаан. Орук шимчээшкининиң айыыл чок чоруун хандырары-биле чаа орук демдектерин база медээ чагыжыгаштарын тургускан.  

2019 чылда «Енисей» орук эргелели Р-257 оруктуң регионнуң кызыгаарында 50 ажыг километр оруун септээр планныг. «Енисей» федералдыг автооруктуң ниити узуну 1123 км, ооң 416 км-и - Тыва Республиканың девискээринде.  

«Бистиң чугула ажылдарывыстың бирээзи – «Кызыл - Шагаан-Арыг – Чадаана - Хандагайты» авторукту федералдыг стандартка дүүштүр кылып, күзеливисти боттандырары, каш базымда келген. Бөгүн «Енисей» орук эргелели федералдыг казна албанының начальниги Сергей Аникин меңээ, орук участоктарын эде чаартыр талазы-биле 2018 чылдың планы чедиишкинниг күүсеттингенин илеткеди. 2019 чылда бистиң оруувустуң эң-не нарын болгаш айыылдыг участоктарынга септелгени кылыр деп дугуруштувус. Чаңгыс чер-чурттугларым эки талаже өскерлишкиннерни эскерип тур боор. Чыл азы чартык чыл бурунгаар турганы-биле, канчап деңнээр. Ам оон-даа эки апаар» - деп, Тываның Баштыңы Шолбан Кара-оол бодунуң блогунда ужуражылганы түңнээн.