02.11.2018
Тыва дыл хүнүнде, Москвада тыва студентилер ниитилежилгезиниң активчилери диктант бижиир деп шиитпирлээн.
Москваның дээди өөредилге черлеринде өөренип турар студентилер, чурттуң найысылалында ажылдап, чурттап чоруур чаңгыс чер-чурттуглар Орус географтыг ниитилелдиң конференц-залынга чыглып келген. Аныяктар аразынга тыва дылдың шын бижилгезинче ынчаар кичээнгейни угландырарын шиитпирлээни ол.
Бойдус чаагайжыдар институттуң студентизи Алдынсай Ооржак мынча деп чугаалаан: - "Диктантны номчуп бээр дээн саналды күзелдиим-биле хүлээп алдым. Меңээ ындыг бүзүрелди илереткен студент эштеримге четтирдим. Диктантының сөзүглелин шилип, белеткенирде, тыва дыл башкылары-биле сүмелешкен бис. Ындыг чугула болуушкунга киришкенимге, өөрүп тур мен».
осквага ажыл-агый аайы-биле сургакчылап чораан Тываның Баштыңы Шолбан Кара-оол, диктант бижииринге шылгарааннарга, шаңналдарны боду тывыскан.
Шолбан Кара-оол биче төрээн чери-биле сырый харылзаалыг, бодунуң чонунуң дылын билир болгаш хүндүткеп чоруур чаңгыс чер-чурттугларынга байырны чедирген. Республика Баштыңы күүселдеде төлевилелдер дугайында сонуургадып, 2019 чылда Тываның социал-экономиктиг хөгжүлде планнарын үлешкен.
Диктантыны хөй кезии эки бижээн. Дыка хөй кижилер тыва дылга диктант бижиир деп эгелээшкинни деткип, ам чүгле байырлал хүнүнде эвес, а анаа хүннерде база бижип турар деп шиитпирлээн.
"Москва ышкаш, улуг мегаполиске безин чурттап тургаш, төрээн дылывысты утпас бис. Чүге диктант шилип алган бис? Болган чок-ла, шын бижилгеге чазып алыр бис, ону социал четкилерде бо-ла эскерип болур. Ынчангаш диктант бижиири, сөстү шын бижип турарын хынаарынга, орфографтыг шын бижиирин сактып чоруурунга, эки чылдагаан болур. Тываның Баштыңы Шолбан Валерьевич Кара-оол бо хемчегде келгенинге канчаар-даа аажок өөрүп тур бис. Идепкейлиг киржикчилерге өртек чок белек – номнарны тудусту. Деткимчези дээш, улуу-биле четтирдивис!» - деп, М. Ломоносов аттыг Москваның күрүне университединиң студентизи Лодой Хомушку чугаалаан.