Тываның Кадык камгалал яамызы уругларның санаторлуг-курорт эмнээшкинин организастаар ажылды уламчылавышаан

Оолдар, уруглар «Шира хөл», «Белокуриха», «Вулан», «Карачи хөл», «Калуга-Бор», «Даг агаары», «Кратово», «Тесь», «Металлург» санаторийлерге эмненип, дыштанган. «Пионер», «Кирицы», «Пушкинский» туберкулезка удур санаторийлерже 49 уругну аъткарган. Санаторлуг-курорт эмнээшкининче чоруткан уруглар аразында инвалид 196 кижи бар. Оларның 155-жи «авазы болгаш уруг» путевка-биле дыштанган. Оон аңгыда өскүс болгаш ада-иезиниң хайгааралы чок арткан, азырандыда барган 434 оолдар, уругларның база хөй ажы-төлдүг, долу эвес, эвээш орулгалыг өг-бүлелерден 1623 кижиниң дыштанылгазын организастаан.  

Өскүс база ада-иезиниң хайгааралы чок арткан уругларга, боттарын хандырып шыдавас, кадык байдалы кызыгаарлыг уругларга бүдүн чыл дургузунда ажылдаар санаторийлеринче база санаторлуг-кадыкшылга лагеринче дыштаныр халас путевкаларны берген. 

Ада-ие азы хоойлу езугаар төлээлер уругга санаторлуг-курорт эмнээшкининче путевка алырда, чурттап турар черинде эмнелге албан черинче билдириишкинни киирер. Эмнээшкинче уругларны шилип чорударда, санаторлуг-курорт эмнээшкини алыр аарыгларын азы ап болбас чүүлдерин көөр. Эмнелге организациязының хайгааралында турар, хоочураан аарыглыг уругларның санын көрүп, республиканың эмнелге организацияларының аразынга санаторлуг-курорт эмнээшкининче путевкаларны үлээр.