Тываның культура сайыдының оралакчыларын бадылаан

Тыва Республиканың культура болгаш туризм сайыдының бирги оралакчызы – туризм хөгжүлдезиниң талазы-биле департамент начальниги албан-дужаалга 32 харлыг Михаил Табаевтиң кандидатуразы кирген. Ол 2009 чылда Россияның туризм талазы-биле тускай академиязынга «организацияның менеджмени» мергежилди чедип алган. Ол диплом ажылын «Тыва Республикада археологтуг туризмни сайзырадыры» деп темага камгалаан. Кызыл хоорай мэриязының Культура болгаш туризм департаментизинге ажылдап, турисчи фирманы удуртуп турган. Сөөлгү үш чылда Тываның Культура болгаш дыштанылганың национал парыгының директорунга оралакчылаан. Республика Чазааның кежигүннери Табаевти үстүнде албан-дужаалга бадылаан. 

"Коллегалар туризмни хөгжүдер чаа идеяларны болгаш угланыышкыннарны боттандырарын күзеди. Четтирдим, кызып ажылдаар мен. «Хөй чугааның орнунга, эки ажылдаар» деп кыйгырыгны сагыыр мен" – деп хурал соонда, Михаил Табаев тайылбырлаан. 

Чазак хуралында культура болгаш туризм талазы-биле сайыттың база бир оралакчызын бадылаан. 42 харлыг Лилия Дамбаа профессионал уран чүүлдү, уругларның музыка школаларында өөредилгени харыылаар. Л. Дамбаа Красноярскиниң күрүнениң уран чүүл институдун "хылдыг хөгжүм күүселдези" мергежилдиг дооскан. Р. Кенденбиль аттыг республиканың уран чүүл школазынга ажылдап турган. 

"Ростислав Кенденбиль аттыг республиканың уран чүүл школазынга 20 чыл ажылдадым. Баштай башкылап, оон директорнуң өөредилге-кижидилге талазы-биле оралакчызынга. Үе-биле деңге базып, чаа сорулгаларны салып, бедик көдүрлүүшкүннүг ажылдаарын эштерим күзеди» - деп, Лилия Дамбаа чугаалаан. 

Ведомствонуң тургузуу өскерилген болгаш, ам, Тыва Республиканың Культура болгаш туризм яамызы деп адаар. Культура яамызы мооң мурнунда база туризм айтырыгларын харыылап турган, бо удаада яамының адында туризмни кииргени ол угланыышкында ажылдар күштелир ужурлуг деп демдеглээн. Тыва Республиканың Культура болгаш туризм яамызының чаа тургузуу езугаар, сайыт Алдар Тамдын ам үш оралакчылыг. Виктор Чигжит бирги оралакчы бооп 2016 чылдың төнчүзүнден бээр ажылдап турар.