«Енисей» автооруктуң Тывада 24 километрин чыл төнчүзүнге чедир септээр

Ниитизи-биле 12 километр хемчээлдиг ийи объектиде (851 – 859 км, 936 – 940 км) ажылдар адакталып турарын ТР-ниң орук-транспорт яамызы дыңнаткан. Оруктуң кыдыгларын быжыглап, быжыг сай-мастиктен чаа бетон асфальт шывыын чаткан, 40 чаа орук демдектерин база 150 медээ чагыжыгаштарын тургускан. Амгы үеде орук демдектерин шыйып, орук кырын дескилеп база быжыглаарынга ажыглаар Рено дөжээн чадып, чоон удазын конструкцияларны оруктар кыдыында шөйүп турар. 

База ол ышкаш, Ак-Дуруг суурда (963 – 968 км) база Өвүр кожуунда (1070 – 1076 км) орук участоктарында септелге ажылдары кидин-түлүк. Бүдүрүлге ажылдарының зоналарында оюп эрттерин база дүргенин эвээжедирин айыткан медээ айтыкчыларын болгаш түр орук демдектерин кадаан. Тудугжулар ол участоктарда ажылдарны сентябрь төнчүзүнге чедир доозар планныг. 2018 чылда Тываның девискээринде «Енисей» оруунуң 24 километрин септеп селиир.  

«Енисей» Р-257 федералдыг автомобиль оруунуң узуну 1123 километр, ооң 416 километри Тываның девискээринде чыдарын сагындыраал. Красноярскдан эгелээн орук республиканы Россияның транспорт четкизи-биле тудуштурган. Тываның Баштыңы Шолбан Кара-оол, оруктуң угланыышкынын өскерткен соонда, ооң төнчү пунктузу российжи-моол кызыгаарда «Хандагайты» хыналда-эрттирилге пунктузу болурун чедип алган. Регионнуң эрге-чагыргазы хыналда-эрттирилге пунктузунга хөй талалыг эрге-байдалды чедип ап, Енисей Сибириниң регионнарга Моолче болгаш Кыдатче транзит автомобиль орукту ажыдар сорулгалыг. Орукчулар Тывада 300 хире километр орукту федералдыг орук стандартынга дүгжүп турар кылдыр септеп селиирлер.