Тыва ажык-кончаага үндүрүг киирилдезин өстүргени дээш РФ-тиң Чазаандан шаңнал акшаны алган

017 чылда республика ажык-кончаадан бюджетче үндүрүг киирилдезиниң үлүүн 2,7 катап көвүдеткени дээш, ындыг шиитпир хүлээп алдынган. Сөөлгү беш чылда Тыва үндүрүглер киирилдезин ниитизи-биле 41 хуу көвүдеткен. 

Республика Баштыңы Шолбан Кара-оол чазактың ол шиитпирин тайылбырлап тура, ол сан-чурагайларның артында Тывада ажыктыг казымалдар тывыжы-биле холбаштыр улуг инвестиция төлевилелдерин шимчедип, боттандырар чымыштыг ажылдың чылдары турарын айыткан. Үндүрүг санаашкыннарының, ылаңгыя ажык-кончаага үндүрүгнүң кол өзүлдезин даг бүдүрүлгези берген. Кызыл-Таштыгның полиметалл чыдынының болбаазырадылгазы, Межегей участогунда хөмүр-даш тывыжы – оларның аразында. Эрткен чылын республика хөмүр-даш казып-тыварын ийи катап көвүдедип, 1,5 млн. тонна көргүзүгнү бир-ле дугаар ашкан. 

Оон аңгыда, Тываның экономиказында көскү үлүг-хууну киирип эгелээн регионнуң биче болгаш ортумак бизнес хөгжүлдезинде чедиишкиннерни айтыр апаар деп, Шолбан Кара-оол демдеглээн. РНП-те биче экономиканың үлүү 12 хуу ашкан. Бөгүн республикада 9 муң хамаатыларны ажылче хаара туткан, биче болгаш ортумак сайгарлыкчы чоруктуң 7 муң 693 субъектизи ажылдап турар. 2017 чылда оларның садыг-саарылгазы 25,6 млрд. рубльга дең болган.  

Тыва-биле кады 63 регион үндүрүг курлавырын өстүрген дээш деткимче дотациязын алыр. Ниитизи-биле 30,6 млрд. рубль акшаны оларга үлээн. Сибирь федералдыг округтуң 12 регионундан, Тывадан аңгыда, Алтай биле Хакас республикалар, Забайкалье биле Красноярск крайлар, Иркутск, Кемерово база Новосибирск областар доктаалда кирген. Организацияларның ажык-кончаазындан үндүрүг киирилдезин элээн көвүдеткен РФ-тиң субъектилери дотация акшазын алырын сагындыраалыңар.