Дирижер Алим Шахмаметьев: Тываже чалаар деп бодаваан мен

 Тоолчургу профессор, Ленинградтың дирижер школазының үндезилекчизи Илья Мусинниң өөреникчизи фестивальда Халилов аттыг Тываның күрүне филармониязының Виктор Тока аттыг симфониктиг оркестриниң көргүзүүн удуртур. Новосибирск филармониязындан беш хөгжүмчү – Олег Багинский, Павел Крупа, Людмила Ким, Сергей Обухов база Александр Абрамов база оркестрге ойнаарлар. 

«Тыва Республикаже чалалга алыр мен деп бодаваан мен. Ол регионнуң дугайында дыка хөйнү билир бис – колдуунда-ла ооң эрткен төөгүзүн. Бир-ле чүве билип алыксаан күзел база профессионал сонуургал – бо ийи артистиң расписаниезин хенертен өскертип болур. Чер кырында эң-не тывызыксыг оран – Тываның хөгжүмчүлери база көрүкчүлери-биле ужуражылганы четтикпейн манап тур мен» - деп, – деп Алим Шахмаметьев бижээн. 

Тыва филармонияның ынчаар күштелдирген симфониктиг оркестриниң репертуары амдыызында тодараттынмаан. Ындыг болзажок, Владимир Токаның «Гобойга ноктюрн» деп чогаалы фестивальга чаңгыланыр чадап чок. Чүге дизе, фестивальдың бир хедлайнери - гобой ойнакчызы Алексей Балашов болуру билдингир.  «Үстүү-Хүрээ фестивалы кандыг-даа фонограмма чок, дириг хөгжүмнүң шуулганы бооп келген. Бистиң филармонияның суртаалдап чорууру симфониктиг аялга фестивальдың бир онзагай үнү апаарынче чоорту чедип келген бис» - деп, фестивальдың директору, Тыва Республиканың уран чүүлүнүң алдарлыг ажылдакчызы, Тываның күрүне филармониязының директору Игорь Дулуш демдеглээн. 

«Ят-Ха» этно-рок-бөлүктен Альберт Кувезин, Лондондан албан-биле ужуп келген британ хөгжүмчү Теодоре Ципио бо чылын эртер «Үстүү-Хүрээ» фестивалының күзенчиг аалчылары ол. Оон аңгыда «Хартыга» этно-джаз-бөлүү, Улан-Батордан 27 хөгжүмчү составтыг улуг джаз-бэнд фестивальды каастаар. «Хөгжүмнүң аңгы-аңгы угланыышкыннарында ажылдап чоруур хөгжүмчүлер бот-боттарын дыңнаарлар боор деп идегеп турар бис. Хүн бүрүдеги амыдыралда олар бот-боттарын танышпас бол, маңаа боттарының чогаадылгазынга үнелелди бээринге бүзүрээр мен» – деп, Игорь Дулуш демдеглээн.