Тываның Баштыңы РФ-тиң кызыгаар камгалаар албанның 100 чылы-биле байырны чедирип, шаңналдарны тывыскан

Май 28-те, Улусчу чогаадылга бажыңынга, Россия Федерациязының кызыгаар албанының 100 чыл юбилейинге тураскааткан байырлыг хурал болуп эрткен. Ук хемчегге чүгле кызыгааржылар эвес, оларның өг-бүлелери – кадайлары, ажы-төлү, ада-иелери киришкен.

«Бөгүн Россияның кызыгаар албаны албан езузу-биле үндезилеттингенден бээр 100 чылын демдеглээн. Олар боттарының айтырыы, албан-херээ, ылаңгыя заставаларда долгандыр хүрээлели-биле, онзагай шериг кезээнге хамааржыр. Кызыгаар черде кезектер езулуг улуг өг-бүле апаар – солдаттар база офицерлер, кадайлары, ажы-төлү, шупту бот-боттарынга чоок, таныш. Байырлал хүннеринде, бистиң Тываның кызыгаар отрядындан ону көрүп болур: өг-бүле байырлалында чыглып келген ышкаш, өөнүң ишти, уруг-дарыы шупту ында боор. Албан эрттирип турар кызыгаарың болгаш чериң - шуптузунга төрээн бажыңы, олар - езулуг акы-дуңмашкылар. Кызыгаар чоогунда суурларның чурттакчылары кызыгааржыларга төрелинге ышкаш, чылыг-чымчак хамаарылгазы анаа эвес. Кызыгааржылар чүгле кызыгаарны эвес, а чурттакчыларны, бистиң малчыннарывысты, араттарывысты база камгалап турар.  

Бистиң аныяктарывыстың кызыгааржылар-биле чоок харылзаазы келир үеде мергежил шилип алырга улуг салдарны чедирип турар. Сөөлгү чылдарда, чылдан чылче, федералдыг айыыл чок албанының дээди өөредилге черлерин дооскан чаңгыс чер-чурттугларывыс Тываның кызыгаар эргелелиниң одуруунче кирип, кызыгаарда албан хүлээлгезин күүседип чоруурлар. Кызыгаар албанының хоочуннарынга, штаттан дашкаар ажылдакчыларынга, тергиин дээн кызыгааржыларга шаңналдарны өөрүшкү-биле тыпсыр-дыр бис. Байырлалыңар-биле, өңнүктер» – деп, Тываның Баштыңы Шолбан Кара-оол чугаалаан.  

Тыва Республиканың Баштыңының чарлыы-биле, албан хүлээлгезин сыныш чок күүсеткени дээш, прапорщик Амзараков Григорий Михайловичиге, улуг прапорщик Корчемкин Андрей Михайловичиге, прапорщик Маспын-оол Федор Борисовичиге Тыва Республиканың Баштыңының Өөрүп четтириишкинин чарлаан.  

Подполковник Пойлов Максим Алексеевичиге, майор Филатенков Александр Сергеевичиге Тыва Республиканың Баштыңының хүндүлел бижиктерин тывыскан.  

Россия Федерациязының федералдыг айыыл чок албанының Тыва Республикада кызыгаар эргелелиниң удуртукчузу Вячеслав Шкиря Тыва Республиканың Баштыңы Шолбан Кара-оолду «Россияның Кызыгаар шериглериниң 100 чылы» медаль-биле шаңнаан.