Тывада өнчү-хөреңги үндүрүглерин чыырының шалыпчы айын чарлаан

Тыва Республиканың Чазааның 2018 чылдың май 15-те № 211-р айтыышкынынга даянгаш, Тыва Республиканың девискээринге 2018 чылдың май 15-тен июнь 15-ке чедир, кижилерден өнчү-хөреңги үндүрүүн (эт-хөреңги, транспорт база чер үндүрүглери) чыыр шалыпчы айны эрттирер. 

Ындыг акцияны өнчү-хөреңги үндүрүглерден чедир кирбээн түңнү база чыылданы көвүдедир дээш, чылдың-на эрттирип турар. Үндүрүг органнары-биле кады тус чер бот-башкарылга органнары шалыпчы айның дургузунда чурттакчы чон ортузунга калбак тайылбыр ажылын чорудуп, организацияларның удуртукчулары-биле ажылдап, суд приставтары, ОШАЧКИ албаннары-биле рейдилерже үнүп, көжүп чоруур офистерни ажылга киириштирер.

 Шалыпчы айны эрттиргеш, эт-хөреңги үндүрүүнден чедир кирбээн үндүттү 4 хууга кызырар планныг. 

2017 чылда шалыпчы ийи айны эрттирген, ооң түңнелинде 43 млн. рубль чыгдынган. Хамаатыларның эт-хөреңги үндүрүүн төлээринге сонуургалы чавыс болуп артпышаан. Тыва Республиканың чурттакчыларын акцияга идепкейлиг киржип, үндүрүглериңерни төлеп алырынче кыйгырдывыс. 

Үндүрүглерни үе шаанда төлевес болза, хөөлер база торгаалдарны немей санаарын сагындыраалыңар.