Тываның Баштыңы дайын хоочуннары болгаш күш-ажылчы фронтунуң киржикчилери-биле ужурашкан
10.05.2018
Кызылда дайынның хоочуннары биле күш-ажылчы фронтунуң киржикчилеринге байырлалдың дүштеки шайлаашкынын Тиилелге хүнүнде эрттирери чаңчыл болу берген.
Тываның Баштыңы Шолбан Кара-оол, Дээди Хуралдың даргазы Каң-оол Даваа, Кызылдың мэри Владислав Ховалыг, билдингир күрүне болгаш хөй-ниити ажылдакчылары Григорий Ширшин база Алдын-оол Канзай дээш, өскелер-даа чыылганнарга байырны чедирген.
Хоочуннарга байыр чедириишкининиң үезинде, дайын чылдарының дугайында сактыышкыннардан аңгыда, тиилекчилерниң салгалы амыдыралчы байлак дуржулгазын дамчыдып, чагыг-сөстерни берген.
Школачылар фронтучуларга база тылдың ажыл-ишчилеринге маадырлыг чоруу дээш четтиргенин илереткен.
РФ-ниң ниити өөредилгезиниң тергиини Наталья Чульдум «Майның вальзын», «60 хардан өрү» клубтуң активчилери, Тываның алдарлыг артизи Сергей Сокольников, «Октай» ансамбли, ТР-ниң культуразының алдарлыг ажылдакчызы Надежда Пономарева дайын чылдарының ырыларын бараалгатканнар.
Тиилелге хүнүнге тураскаадып, 55-ки мотоадыгжы бригаданың дайынчы техниказын таныштырган делгелге, тыва хүрешке маргылдаа, Совет Эвилелиниң Маадыры Хомушку Чургуй-оол Намгаевичиниң 100 харлаанынга тураскааткан чадаг чарыш дээш, өске-даа хемчеглер Тывага эрткен.
Возврат к списку
|