Тываның Баштыңы айыыл чок чоруктуң шупту дүрүмнерин хандырарын аът чарыжының организаторларындан негээн

Понедельникте, аппарат хуралында, Тываның Баштыңы Шолбан Кара-оол айыыл чок чорукту хандырган шупту хемчеглерни алырын чарыштың организастакчылары болур муниципалдыг тургузуглардан негээн. 

«Айыыл чок чоруктуң хемчеглерин сагыыр дээш, чарышка аът мунукчулары кылдыр бичии оолдарның киржирин бүрүнү-биле хоруурун организаторларга сагындырдым. Онза айыылдыын өөренип көргеш, аът чарыштарынче назы четпээннерни хаара тутканы дээш, харыысалга онаар хоойлуну хүлээп алганывысты сактып тур боор силер. Чарыш аъттарының ээлериниң чаагай бодалдарынга бүзүрээш, муңгаранчыг чүүлдерге таваржып турганывыс база бар. Оолдар-биле айыыл-халаптар болган чарыштар төөгүде. Бо удаада маргылдааның организаторларының шынчызынга, хөй-ниитиниң контролюнга база корум-чурум тудар органнарның ажылынга бүзүреп тур мен. Бир эвес чурум хажыдыышкынын көрүп кагзынарза, бир-ле чүве болу бээрин манаан херээ чок. Дөзүнден ону болдурбаңар. Национал ужур-чаңчылдарывыс үнелиг дээш, бистиң ажы-төлүвүстүң амы-тынын база кадыкшылын айыылга чыгаан ажыы чок» - деп, Тываның Баштыңы сагындырган.