Тыва Кышкы универсиада-2019-туң от эстафетазының белеткелинге киржир

Дугужулганы чарган соонда, республика бодунуң девискээринге Студент оюннарның От эстафетазының оргкомитедин тургузар. Факел тудукчуларының регион конкурзунуң түңнелдерин үндүрүп, тиилекчилерниң адын адаар. Оргкомитеттиң составынче эрге-чагырганың тус чер органнарының, дээди өөредилге черлериниң, спортчу организацияларның, кадык камгалал болгаш культура албан черлериниң, айыыл чок чорук органнарының төлээлери кирер. 

«Чаңгыс хемниң ажы-төлү болганывыста, бот-боттарывысты деткижер ужурлуг бис. Сибирьниң, бистиң Россияның имиджизин, спортту хөгжүдеринге улуг салдарлыг, Кышкы универсиада-2019 ышкаш, канчаар-даа аажок улуг хемчег Красноярск крайның девискээринге эрттеринге дыка өөрүп тур бис. Хемчег бедик деңнелге эртеринге бүзүрээр мен. Эстафета ооң чүгле эгези-дир. Маргылдаалар белеткелинде эң чугула хемчегниң бирээзи ол. Эстафета чараш, хөй кижилерни, ылаңгыя аныяктарны хаара тутсун дээш, Тыва шупту хемчеглерге киржир, ынчангаш эң кол утка ында деп бодаар мен. Кышкы универсиада-2019 Сибирьге эрттер болганынга өөрүп тур мен, ниитизи-биле инфраструктурага ол дыка салдарлыг» - деп, Тыва Республиканың Баштыңы Шолбан Кара-оол демдеглээн. 

Эстафетаның оруунда кирген хоорайларга Кышкы универсиада-2019-туң одун уткуп, факел тудукчулары тус черде хоорайның тураскаалдыг черлеринге чедип, байырлал хемчээн эрттирер. Оргкомитет киржикчилерниң болгаш аалчыларның айыыл чок чоруун хандырып, хемчеглер үезинде транспорт база көрүкчүлер шимчээшкининиң схемазын дугуржуп, От эстафетазын аян-шинчи киирип, суй-белектер, полиграфия продукциязын үндүрер.

«Красноярскиниң экономиктиг форуму чүгле экономиктиг айтырыглар талазы-биле ужуражыышкыннарның шөлү эвес, а Кышкы универсиада-2019-туң От эстафетазы дээн ышкаш төлевилелдерин бурунгаарладыр чер болганын демдеглээри чугула. Бөгүн, Тыва база Хакасия-биле, ийи дугуржулгага атты салдывыс. От эстафетазы-биле бистиң Енисейжи Сибиривисти көргүзер бис» - деп, Кышкы универсиада-2019 дирекцияның удуртукчузу Максим Уразов чугаалаан.  

Студент спорттуң бүгү-делегей хүнүнде, 2019 чылдың сентябрь 20-де, Кышкы универсиада-2019-туң От эстафетазының федералдыг чадазы эгелээрин сагындыраал. Студент оюннарның оду Россияның 18 регионунга чедер. Чурттуң 30 хоорай, суурларының кудумчуларын болгаш шөлдерин ол эртер.