Тыва Кино фондузундан кинозалдар чаартынга күрүне деткимчезин алган

Кино фондузу (Ада-чурт кинематографиязынга социал болгаш экономиктиг дуза көргүзер федералдыг фонд) 500 муң чедир чурттакчылыг хоорайларда кинозалдарны чаартырынга күрүнеден саң-хөө деткимчезин бээр ээлчеглиг конкурстуң түңнелдерин үндүрген.

 2018 чылдың январь 19-тан март 2-ге чедир эрткен конкурстуң түңнелдери-биле 56 регионда 172 кинозалдарга акша-хөреңгини тускайлаан. Ол регионнар санында Орлов область, Тыва Республика, Магадан область, Сахалин область, Севастополь хоорай бир дугаар киришкен.

 ТР-ниң Культура яамызының улусчу чогаадылга килдизи Тываның муниципалдыг тургузугларынга федералдыг фондуже чагыгны долдуруп база кииреринге дузалашкан. Барыын-Хемчик биле Чөөн-Хемчиктен аңгыда, Бай-Тайга кожууннуң Кызыл-Даг биле Тээли суурлары база чагыгны кирген, ындыг болзажок Кино фондузу Тываның үш муниципалдыг тургузуунуң - Кызыл-Мажалык, Ак-Довурак база Чадаананың киирген чагыгларын деткээн. Тускайлаан акша-хөреңги-биле кожууннарда залдарны кино көргүзер кылдыр эде дериир. 

Бир кинозалды эде дерииринге-ле 5 млн. рубль ашпас хемчээлдиг акшаны бээр. 2018 чылдың декабрь 15-ке чедир ажылдарны доозуп, кинону көргүзүп эгелээри - албан күүседир негелде. 2012 чылдың төнчүзүнге чедир календарлыг чылдың квартал санында, Кино фондузунуң акша-хөреңгизи-биле эде дериттинген кинозалдар, ада-чурт киноларының 50 хире хуузун көргүзер ужурлуг. 

Эде тудуушкун программазы-биле 79 регионда 811 залдарны деткээн.  

Кинозалдар чаартыр күрүнениң саң-хөө деткимчези-биле 442 кинозал ажыттынган, программаны күүседип эгелээн соонда, көрүкчүлер саны 7,6 млн. кижи четкен (бо чылын 2.1 млн. кижи кинолаан).