Тываның Баштыңы Шолбан Кара-оол Шагаа бүдүүзүнде СФУ-нуң Шериг-инженер институдунуң курсантылары чаңгыс чер-чурттуглары-биле ужурашкан

 «Институттуң башкылары база начальниги-биле ужураштым. Бистиң оолдарның адрезинге мактал сөстерни өөрүшкү-биле дыңнадым. Курсантылар инженер мергежилдерде чедиишкинниг, чаңгыс-даа чурум хажыдыышкыны чок өөренип турарлар. Эр-хейлер!» - деп Шолбан Кара-оол бодунуң блогунда демдеглээн. 

Сибирь федералдыг университеттиң Шериг-инженер институдунче дужаап кирериниң конкурузу улуг-даа болза, Тывадан абитуриентилер хөйү-биле кирип турары өөрүнчүг.  

Сибирь федералдыг университеттиң Шериг-инженер институдунда 98 тыва курсанты өөренип турар. Оларның өөредилгезинге болгаш чуртталгазынга таарымчалыг бүгү байдалдар институтта бар. Тыва курсантылар Сибирь федералдыг университеттиң ниити чуртталга бажыңында чурттап, курсант бүрүзү 5 муңдан 10 муң рубль чедир академиктиг стипендияны ай санында ап турар, ооң хемчээли курсантының социал байдалындан база хамааржыр.  

2016-2017 өөредилге чылының түңнели-биле ийиги курстуң курсантызы Херел Лопсан (Ак-Довурактың № 4 школазының доозукчузу) институттуң эң чедиишкинниг курсантыларының санынче кирген. Херел чедиишкинниг өөренип, институттуң хөй-ниити амыдыралынга идепкейлиг киржип турар. Үшкү курстуң курсантызы Шаанак Биче-оол Сибирь федералдыг университеттиң Шериг-инженер институдунуң «Витязь» командазының составынга Бүгү-российжи «Зарница» шериг-патриотчу оюннарга киришкеш, ооң «Поединок» чадазынга 47 кил чедир деңзилиг киржикчилерниң аразынга бирги черни чаалап алгаш, алдын медаль-биле шаңнаткан. Тыва курсантыларның «Өлчей» деп улусчу чогаадылга ансамбли университетте эртип турар уран чүүл кежээлеринге болгаш чогаадыкчы мөөрейлерге доктаамал киржип, көрүкчүлерниң сонуургалын доюлдурган.  

Тывадан курсантыларга деткимчени көргүзүп турары дээш, Сибирь федералдыг университеттиң удуртулгазынга өөрүп четтиргенин Тываның Баштыңы Шолбан Кара-оол илереткен.