Тывада социал адырның 35 албан чери чаа автотранспорттарны алган

 «Уругларывысты, инвалидтерни, аарыг кижилеривисти транспорт-биле хандырар чидиг айтырыгны шиитпирлээр херек деп Россияның Чазаанга шынзыдып, федералдыг деңнелге бодувустуң туружувусту камгалап тургаш, планнаанывыс езугаар, ону чедип алган бис» - деп, Тываның Баштыңы Шолбан Кара-оол дүлгүүрлерни байырлыы-биле тыпсып тура, чугаалаан. 

Найысылалдың чурттакчыларынга шынарлыг социал деткимчени көргүзер ажылдыг Кызыл хоорай мэриязының Социал политика департаментизи база Хову-Аксы биле Дүргенде бажың-интернаттар инвалидтер аргыштырарынга таарыштыр кылган «FordTransit» автобустуң дүлгүүрлерин алган. Инвалидтер тергезин көдүртүп-үндүрер пультулуг микроавтобустарны садып алырынга 7 млн. рубль үнген.

 Тываның кадык камгалалының санитарлыг автопарыгы база чаа техниканы алган. Российжи бүдүрүкчүнүң дүрген дуза чедиреринге тускайжыттынган автомобильдерин онза хереглелдиг медицина албан черлери – кожуун эмнелгелеринге 8 машинаны, орук озал-ондаа база өске-даа болуушкуннар-биле холбаалыг кыйгыртыгларже үнер 2 машинаны Республиканың дүрген дузаның база айыыл-халаптарның эмнелге төвүнге берген. Дүрген дуза төвү эң хөй чалалгаларлыг Кызыл хоорайны бүрүнү-биле хандырып турар. Чижээ, эрткен чылын дүрген дузаның Кызылда 1 бригадазы хүнде-ле ортумаа-биле 18 чалалгаже үнген, а Россияда ол көргүзүг оон 1,5 катап эвээш. Шак ындыг хайымныг ажылдан санитарлыг транспорт дүрген элеп-төнери чугаажок, ынчангаш ону дүрген солууру – эргежок айтырыг.

 22 школачы автобустар уруглар аргыштырылгазында хайымныг байдалды чавырылдырарынга дөгүм. Планнап турганы ышкаш, бо удаада ол транспортту колдуунда көдээ школалар алган. Ынчангаш ГАЗ биле Форд-Транзит маркалыг автобустарның дүлгүүрлерин Ак-Довурак, Бай-Тайга, Барыын-Хемчик, Чөөн-Хемчик, Каа-Хем, Кызыл, Өвүр, Бии-Хем, Сүт-Хөл, Таңды кожууннарның школаларынга берген.

 Кадыкшыл байдалы кызыгаарлаттынган уруглар, оолдар өөренип турар Кызылдың 10 дугаар школазы үрде манааны автотраспортту бо удаада алган. Ам школаның өөреникчилериниң баар-кээри айыыл чок, өөредилге-кижиздилгелиг хемчеглерже чедери хала чок апарган. Кызылдың 8 дугаар школазының автобузу хоорайның оң талакы дачаларында база Вавилон ээтпээнде школачыларын тускай маршрут болгаш расписание-биле аай-дедир аргыштырар. 

Кызылдың 9 дугаар гимназияның автобузу солагай талакы дачалардан, Спутник микрорайонундан 489 өөреникчини, чоокку Каа-Хемден 29, Южный микрорайонундан 97 уругну сөөртүр. Кышкы сооктар үезинде автобус дыка херек. Кызылдың 12 дугаар школазында чоокку Каа-Хемден база хоорайның өске-даа районнарындан 1500 хире кижи өөренип турар. Оон аңгыда найысылалдың 14 дугаар школазы биле 16 дугаар лицеи база чаа автобустарны алган.  

 «Республиканың школаларын автобустар-биле хандырар ажылды ам-даа уламчылаар бис. Эрткен чылын федералдыг программа күүселдези-биле республикага 33 школа автобустарын садып алыр саң-хөөнү чедип алдывыс. Чаа өөредилге чылының эгезинде 176 школаның 120-зи транпорттуг турган. Ажыглалда техника аймаа эргижирээн деп чылдагаан-биле 2017 чылда 80 автобуска чагыг киирген бис. Ам бөгүн 32 автобус немешкени бо. Ол айтырыгны ам-даа тургузуп, келир чылда база программаже кирерин чедип алыр бис» - деп, Тываның Баштыңы Шолбан Кара-оол чугаалаан.  

Тываның Баштыңы уругларның айыыл чок чоруу дээш автомашиналарны үезинде септеп турарын, эдинге камныг болурун, чогуур сорулгага ажыглаарын чагаан.