Тываның Баштыңы 2018 чылда регион төлевилелдерин деткиир айтырыгларны Күрүне Думазының удуртукчулары-биле чугаалашкан

 Тываның Баштыңы Шолбан Кара-оол РФ-тиң Федералдыг Хуралының Күрүне Думазынга элээн каш ажылчын ужуражылгаларга киржип, 2018 чылда республикага немелде саң-хөө-биле дузалаарының хемчеглерин дугурушкан. 

Российжи парламентиниң адаккы палатазының даргазы Вячеслав Володин, ооң оралакчызы, «Чаңгыс демниг Россия» фракцияның удуртукчузу Сергей Неверов-биле ужурашкан.

Республика Баштыңы ол ужуражылгаларның түңнелдерин бодунуң блогунда бижээн. «Республикада социал-экономиктиг байдалды хөгжүдер дээн бистиң күжениишкиннеривис база хемчеглеривистиң дугайында илеткедим. Чугула дээн бистиң элээн каш тудуг объектилеривисти доозарынга инвестицияны тывар база эмчилер, башкыларның шалыңнарын өстүрер дугайында президентиниң чарлыктарын күүседиринге Вячеслав Викторович деткимчени бээрин аазады. «Чаңгыс демниг Россия» партия республиканың сонуургалдарын камгалаарынга кезээде биске дузалажып турар. Бо удаада база шупту бүде бээринге бүзүрээр мен» - деп, Шолбан Кара-оол бижээн.

Российжи парламентиниң удуртукчулары-биле ужуражылгалар үезинде, Аныяктар ордузу, Ак-Довурак биле Шагаан-Арыг хоорайларга модульдуг котельнаялар, Тываның гуманитарлыг болгаш дузалал шинчилелдериниң институдунуң тудуу дээн ышкаш объектилерни тудуп доозарын чугаалашкан.

 Оон аңгыда, республика Коммунал көвүрүгнү чаартырының, Каа-Хем суурда культура-спорт комплекизин тударының графигин база акшаландырыышкынының хемчээлин 2018 чылда арттырып алырынга магадылалды чедип алыры чугула.