Аркадий Ротенберг, ДДФ президентизи: Тыва спортчу башкарыкчы күштүг командалыг регион апарган

 23 харга чедир юниорлар аразынга дзюдога Европаның бирги чери дээш маргылдаага Тываның төлээзи Саян Ондарның бедик чедиишкини – алдын медальды чаалап алганы дээш Дзюдога делегей фондузунуң президентизи Аркадий Ротенберг, Россияның Дзюдо федерациязының президентизи Василий Анисимов олар Тыва Республиканың Баштыңының адынче байыр чедиришкинниг бижикти чоруткан. 

  Спортчу организацияларның удуртукчулары мынча деп бижээн: 

 - Хүндүлүг Шолбан Валерьевич! 2017 чылдың ноябрь 11-де Черногорияның Подгорица хоорайга болуп эрткен «23 харга чедир юниорлар аразынга дзюдога Европаның бирги чери дээш» маргылдаага силерниң регионнуң төлээзи Саян Ондарның (алдын медаль) чайынналчак чедиишкинниг болганы дээш сеткилдиң ханызындан байыр чедириишкинин хүлээп ап көрүңер. 

 Саян Ондарның көргүскен түңнелдери Силерниң регионда дзюдонуң хөгжүп турарының бадыткалы-дыр. Тыва Республикада спортче Силерниң ханы сонуургалыңар ачызында спортчу башкарыкчы күштүг командалыг регион болу берген. Силерниң төлевилелдериңерни шуптузун боттандырарынга Силерге хей-аътты, а Силерниң регионуңарга – чечектелиишкинни болгаш чаагай чорукту күзедим! Хүндүткел-биле, ДДФ-ниң президентизи А. Ротенберг. 

 - Хүндүлүг Шолбан Валерьевич! «Россияның дзюдо федерациязы» бүгү-российжи хөй-ниити организациязының мурнундан Черногорияның Подгорица хоорайга 2017 чылдың ноябрь 11-де «23 харга чедир юниорлар аразынга дзюдога Европаның бирги чери дээш» маргылдаага Саян Ондарның чедиишкинниг киришкени-биле Силерге сеткилим ханызындан байырны чедирдим.  

 Алдын шаңнал – ханы хүндүткелде төлептиг канчаар-даа аажок улуг чедиишкин. Регионда дзюдонуң хөгжүлдезинче угландырган кичээнгейиңерни Силерниң спортчуңарның чедиишкини бадыткап, келир үеде Европа, делегей база Олимпий оюннары дээн ышкаш эң-не бедик дңенелдиг маргылдааларга магадылалды берип турар. Хүндүткел-биле, РДФ-тиң президентизи В. Анисимов.

  Дыштаныр хонуктарда Тываның Баштыңы Шолбан Кара-оол беш тыва спортчунуң улуг маргылдааларга тиилелгелерин дугайында билип кааш, бодунуң бижидип алыкчыларынга ол дугайында дораан дыңнаткан:

  «Бистиң оолдарывыс – дайынчы болза, эң тергиин; спортчу болза, бир дугаарында! Дүүн Венгрияның Будапешт хоорайга кикбоксингиге делегей чемпионадынга Тывадан үш спортчу тулган тиилелгени чедип алган болза, бо хүн ийи алдын медальдыг болдувус. Саян Ондар дзюдога Европаның бирги чери дээш маргылдаага алдын медальды чаалап алган болза, Саян Хертек самбога делегей чемпионадынга база дээди шаңналга төлептиг болган. Ол анаа-ла чедиишкин эвес, а кижи бүрүзүнүң тус-тузунда база шуптузунуң демниг карак-кызыл, тускай сорулгалыг ажылының түңнели дээрзинге бүзүрээр мен! Спортчу идик-хеп база амыдыралдың кадык овур-хевири мода болгаш норма апарганынга өөрүп, канчаар-даа аажок чоргаарланып тур мен. Шак мындыг чайынналчак тиилелгелер – бистиң чоргаарлывыс-тыр, ол бистерни каттыштырып база төрээн черивиске ынакшылывысты күштелдирер. Эр-хейлер!» 

 «Бо-дур бо! Чаңгыс чер-чурттуглар, бистиң үш кикбоксерларывыс делегейниң спортчу бедигээжиниң бажында! Будапештке болуп эрткен делегей чемпионадының эң-не берге хевирлеринге Салчак Антон (1995), Монгуш Кежик (1996), Ооржак Сергек (1985) тиилээннер – байырдан чедирип каалыңар! База ол ышкаш оларның тренери Монгуш Мерген-оол Намчаловичиге база байырдан чедирээлиңер! Эр-хейлер! Чоргаарландывыс! Манап тур бис!»