Тываның Чазаа инвалидтер интернадының чемненир чериниң капиталдыг септелгезинче 1,7 млн. рубльди тускайлаар

 Республиканың Баштыңы Шолбан Кара-оол эрткен чылын ук социал албан черин хынап чорааш, интернаттың эрги оран-савазын коллективтиң бот-тывынгыр база чүткүлдүг чоруу-биле үлегерлиг албан чери кылдыр тудуп, интернатта 200 ажыг аарыг кижини арыг-силиг ажаап турарын онзалап демдеглээн.

 ТР-ниң Чазааның 2017 чылдың июль 6-да хүлээп алганы чурттакчы чоннуң социал хандырылгазын организастаар материал-техниктиг баазаны быжыглаар регион программазы-биле, акша-хөреңгини республиканың Күш-ажыл болгаш социал политика яамызынче шилчидер. Ол программа-биле планнатынган акша-хөреңгиниң 1,44 млн. ажыг рублин республика боду хандырар. Ол РФ-тиң Пенсия фондузундан чартык миллион ажыг рубль субсидияны хаара тудар аргалыг. Социал программаның чамдык акшазын – 208 муң рубльди ажылдавайн турар пенсионерлерни компьютерге өөредиринче чарыгдаар.