Тываның талантылыг уруглар, оолдарынга премиялар болгаш грантыларны тывыскан

 Тыва Республиканың Баштыңы Шолбан Кара-оол база ТР-ниң Хөй-ниити палатазының даргазы Хонук-оол Монгуш эң-не шылгаараан уругларга шаңналдарны боттары тудускан.  

 Россия Федерациязының Президентизиниң премияларынга 4 кижи төлептиг болган. Республиканың элээди уругларның спорт школазын ийи кижи төлээлээн. Дзюдога Сибирь федералдыг округ маргылдааларының тиилекчизи Ачыты Домбуу биле дзюдо болгаш самбога республика маргылдааларының чемпиону, дзюдога Европа Кубогунуң эдилекчизи Саян Ондар олар-дыр. 

 Р. Кенденбиль аттыг республиканың уран чүүл школазының өөреникчизи, Тыва Республиканың уран чүүл школаларының өөреникчилериниң аразынга «Уран чүүлдүң челээжи» конкурс-фестивальдың тиилекчизи Аялга Хертек база премияны алган. «Российжи студент час» бүгү-российжи фестивальдың тиилекчизи, Тываның күрүне университединиң студентизи Айгор Кошкендейге база РФ-тиң Президентизиниң премиязын тывыскан.  

 Регионнар аразының школачыларының физика-математика олимпиадазының I чергениң дипломантызы, Кызылдың 5 дугаар гимназиязындан Семен Ховалыгга; «Келир үеже базым» школачыларның республика эртем-шинчилел конференциязының каш дакпыр лауреады, информатика болгаш программированиеге школачыларның бүгү-российжи олимпиадазының түңнел кезээниң киржикчизи, Кызылдың 14 дугаар школадан Максим Ковитога; 21 харга чедир аныяктар ортузунга хостуг хүрешке Россияның Бирги чериниң база аныяктар ортузунга спортчу хүрешке бүгү-российжи маргылдааның I чергениң дипломантызы, РЭУСШ-дан Кежик Чымбага; Россияның өөреникчилер ортузунга VII чайгы спартакиаданың призеру, элээди оолдар аразынга спортчу хүреш (хостуг хүреш) талазы-биле Россияның Бирги чериниң база өске-даа маргылдааларның призеру, олимпийжи курлавыр спорт школазындан Амир Чанзанга; «Мен - Россияның хамаатызы мен» социал төлевилелдиң республика конкурузунуң тиилекчизи, Таңды кожууннуң Сосновка школазындан Серен-Долума Оюнга; «Чурукта кижиниң чуртталгазы-биле чурттап тур мен» бичии уруглар чуруктарының бүгү-делегей конкурузунуң база Тыва Республиканың уругларның хөгжүм, хореография, уран чурулга болгаш уран чүүл школаларының өөреникчилериниң аразынга «Уран чүүлдүң челээжи» конкурс-фестивальдың дипломантызы, Көк-Тейниң уран чүүл школазындан Надежда Монгушка Тыва Республиканың Баштыңының грантыларын тывыскан. 

 Тыва Республиканың Баштыңының премияларын элээн каш номинацияларга үлээн. «Эртем-техниктиг чогаадылга болгаш өөредилге-шинчилел ажыл-чорудулгазы» кезекке үш школачыны демдеглээн. Химияга бүгү-российжи олимпиаданың база «Келир үеже базым» республиканың эртем-шинчилел конференциязының дипломантызы, Кызыл хоорайның 5 дугаар гимназиядан Андрэль Кыр; «Ада-чурт» республика конкурузунуң тиилекчизи, «Ада-чурт» чурт шинчилел ажылдарының бүгү-российжи конкурузунуң дипломантызы, Өвүр кожууннуң Дус-Даг школазындан Сендима Кертик-оолга; математиктиг тулчуушкуннарның Х Новосибирск турнириниң бирги лигазының призеру, математика болгаш англи дылга школачыларның бүгү-российжи олимпиадазының регион чадазының призеру болгаш тиилекчизи, ТР-ниң Күрүне лицейинден Дензенма Сереп премияга төлептиг болганнар.  

 Бокска Тыва Республиканың Бирги чериниң база Сибирь федералдыг округтуң чемпиону Владимир Чоодуну; элээдилер ортузунга Тываның Бирги чери дээш база Сибирь федералдыг округ маргылдаазының призеру, Кызылдың 12 дугаар школазындан Чимис Шан-оолду; дзюдога Сибирь Федералдыг округтуң бирги чери дээш база республика маргылдааларының чемпиону, РЭУСШ-тан Буян-Херел Санааны ТР-ниң Баштыңының премиязының «Сонуургактар спорту» номинацияга онзалап демдеглээн.  

 Бүгү-Россияның Аныяктарның филология чемпионадының регионга тиилекчизи, «XXI вектиң лидери» лидерлер болгаш элээдилер-аныяктар хөй-ниити каттыжыышкыннарының республика конкурузунуң база «Ада-чурт» чурт шинчилел мөөрейиниң хүндүлел бижииниң эдилекчизи, Кызыл кожууннуң Каа-Хем суурнуң 1 дугаар школазындан Лера Балчирбай ТР-ниң Баштыңының премиязын алган. 

 «Сыгырганың сыгыды» хөөмейге республика мөөрейиниң база «Хамнаарак» эстрада ырлар күүседикчилериниң конкурузунуң Дээди шаңналының эдилекчизи, А. Чыргал-оол аттыг Кызылдың уран чүүл колледжизинден Лопсан Мундукай; «Океан» бүгү-российжи уруглар төвүнүң «Океанның эртинези» конкурстуң Дээди шаңналының эдилекчизи, «Чаа аттар» ыры болгаш эстрада уран чүүлүнүң регионнар аразының фестиваль-конкурузунуң, «Уран чүүлдүң челээжи» республика конкурс-фестивалының лауреады, Кызылдың 14 дугаар школазындан Даниил Нагаев «Уран чогаадылга» номинация-биле ТР-ниң Баштыңының премиязынга төлептиг болганнар.  

 Шолбан Ооржак "Профессионал мергежил" номинацияга премияны алган. Ол - Тываның технологтуг техникумунуң төлээзи, «Web-дизайн» компетенцияга WorldSkills стандарттарын ажыглаан Тываның I регион чемпионадының тиилекчизи, «Аныяк профессионалдар» II регион чемпионадының призеру.  

 Тываның Баштыңы Шолбан Кара-оол езулал төнчүзүнде, уругларның хөй-ниити организацияларының активчилеринге, бичии шинчилекчилер болгаш чогаадыкчыларга, аныяк профессионалга, талантылыг спортчуларга РФ-тиң Президентизиниң премияларын, ТР-ниң Чазааның Даргазының грантыларын болгаш премияларын алганы-биле байырны чедирип, оон-даа бедик чедиишкиннерни болгаш тиилелгелерни күзээн.