Федералдыг трассадан Сукпак суурже кирер орукта капиталдыг септелгени кылып турар

 2017 чылда муниципалдыг тургузугларда планнаан Тываның орук четкизиниң хөгжүлде программазында кол объектилерге өскерилгелер хамаарышпас. Республиканың Баштыңы Шолбан Кара-оол май 30-де хамаатыларны боду хүлээп ап тургаш, ону дыңнаткан. 

 Чазак даргазы-биле Сукпак суурнуң чурттакчызы Антон Жданов ужурашкаш, суурдан автомагистральга чедир орукту катап кылыр төлевилелди соңгаарлатпазын чаңгыс чер-чурттугларының мурнундан дилээн.  

«Кызыл кожууннуң улуг суурларының бирээзи – Сукпакче кирер орукту бо чайын септээр бис. Чолаачылар оруктарда улуг ойбактар болгаш тиглерден шылап каанын билир бис. Хуу хүлээп алыышкынымда тус черниң чурттакчызы Антон Жданов-биле ол айтырыгны чугаалаштывыс. Соцчетки таварыштыр мээң арынымче орук ажылдарының шынарының дугайында бижиирин диледим. Эрткен чылын Сукпак суурның 6 кудумчузун септээн. Көдээ суурларда оруктарны чаагайжыдары, кудумчуларын чырык-биле хандырары эрге-чагырганың хүлээлгезинде хевээр арткан» - деп, Тываның Баштыңы Шолбан Кара-оол соцчеткилерде бижээн. 

 Кызылга чоок чыдар 5 муң хире чурттакчылыг суурнуң оруун шиитпирлээри найысылалдың бүдүрүлгелеринде ажылдыг чүс-чүс кижиге таарымчалыг деп, ол санаан.

Республика эрге-чагыргазының эът кластерин тургузарынга кол шөл кылдыр туткан болгаш регионнарже продукциязын үндүр садар «Заря» эът комбинады 2016 чылда Сукпак суурда ажылдап эгелээн. Бирги ээлчегде транспорт инфраструктуразын тудары – ол сорулганы чедип алырынга чугула херек негелделерниң бирээзи. 

 Оон аңгыда, Сукпак суур – М-54 федералдыг автомагистральдың чаа маршрудунуң оруунда бирги точка болур. Ынчангаш Тываның Чазаа ооң девискээринде чоок чыдар черлерни оруктуң эрге-байдалынга дүгжүп турар кылдыр чаагайжыдарын хүлээнген.

 Республиканың Баштыңы өске кожууннарның чурттакчыларын база оожургаткан: орук адырының планнары колдуунда өскерилбээн. Көдээ черлерниң оруктарын нормативтиг негелделерге дүүштүр кылырынче 140 млн. ажыг рубльди угландырар. Сукпактан аңгыда, Кара-Хаак, Элегес, Хадың, Бора-Тайга, Шамбалыг суурларже оруктарны, база ол ышкаш «абаза» оруунуң аргажок участоктарын, Чадаана – Ак-Довурак, Элегес-Аксы – Кочетов, Бояровка – Тоора-Хем, Чадаана – Суг-Аксы оруктарын септеп, чаартыр. 

 Кызыл хоорайда чер шимчээшкининден когараан Коммуналдыг тудугну бүрүнү-биле эде кылыр ажылдар орук адырында улуг төлевилелге хамааржырын регионнуң удуртукчузу Шолбан Кара-оол айыткан. Амгы үеде көвүрүглеп чоруп турар техника аймааның көвүдээни-биле, ооң калбаан дорт дилиндек чедир улгаттырары көрдүнген. Көвүрүг тудуунуң ажылдары 2017 чылда эгелээр.  

 Кызыл-Мажалык – Эрги-Барлык оруу – чылдың кол болгаш хөй акша салыышкынныг объектизи. Барыын-Хемчик кожууннуң база суур чурттакчыларының дилээ-биле ол орукту республиканың орук четкизин хөгжүдер программада киирген.