Тывадан пенсионер Бүгү-россияның компьютерге хөй талалыг маргылдаага тиилээн

 Майның 25- 27 хүннеринде Санкт-Петербургка эрткен Бүгү-россияның компьютерге хөй талалыг VII маргылдаазының тиилекчилери илереттинген. 

 Тываның чыынды командазында Бии-Хемден Светлана Намчилова база Кызылдан Чечекмаа Ондар командалар аразынга шаңналдыг черже кирбээн-даа болза, хууда бирги чер дээш чедиишкинниг болганнар. 

 Республиканың төлээзи Чечекмаа Ондар чаңгыстап киржир маргылдааларның бир номинациязынга тиилээн. «Киберпенсионерлер» түңнел кезектиң киржикчилер аразындан чуртталга-коммунал ажыл-агыйының Күрүнениң информастыг системазының ажылдап кылганы программазын ажыглаарынга шылгарап үнген.  

 «Даалгалар дыка солун болду, амыдыралга ажыктыг. Счетчикте көргүзүглерни дамчыдып, форум үезинде кожаларывыска бажың девискээринге сиреньни олуртуп алырын сүмелеп, сандайларны солуур кылдыр башкарыкчы компанияже чагыгны киирип, капиталдыг септелгениң хуусаазының дугайында медээлерни эштеривиске тып берип турдувус. Өскелер база билип алыр кылдыр ол программаның дугайында оон-даа хөй дыңнадыглар турарын күзээр-дир мен» - деп, ол «Муниципальная новостная лента» интернет-порталга интервью берип тургаш, маргылдааның дугайында бодалын чугаалаан.

 Тываның Баштыңы Шолбан Кара-оол чемпионга байырны чедирген. 

 «Төлептиг тиилелгеңер-биле, Чечекма Куртугбаевна! Новосибирскиге маргылдаа соонда, душ бооп аэропортка силерге ужуражы бергеш-ле, ырак-узак орук-суур дивейн, бергелерге торулбас Силерниң чүткүлүңерге бүзүрээн мен. Салган сорулгазын дайынчы мөзүзү база тура-соруу-биле чедип алырының номда бижип, кинода тырттырып кааны эвес, а ылап, көскү чижээ бо-дур, аныяктар!» - деп ол бодунуң блогунда бижээн.