«Ачам, авам, мен – бизнес өг-бүле бис» конкурс

 ТР-ниң Садыг-үлетпүр палатазы ТР-ниң Экономика яамызы биле «ТР-ниң муниципалдыг тургузуглар чөвүлели» ассоциацияның деткиишкини-биле, май 26-да, Россияда Сайгарлыкчы чоруктуң хүнүнге тураскаадып конкурсту эрттирер.

 Бистиң чуртувуста сайгарлыкчылар боттарының бизнезин салгакчылары уламчылаарынга идегелди салып чоруурун бо-ла көрүп болур. Республикада кижилер сайгарлып ажылдаарының орнунга, бюджетке ажылдааны дээре деп санаар. Бистиң чуртувус рынок экономиказы сайзыраан чурттарда ышкаш бизнести, хуу өнчү багай социал салдарлыг дээн төөгүлүг үени чурттап эрткени-биле ону тайылбырлап болур.

 Ындыг болзажок, бизнестиң делегей «акулалары» дээрге-ле салгалдан салгал дамчып келген өг-бүле бизнези болур. Тойота, Митсубиши, Ашан дээн ышкаш улуг бизнестерниң төөгүзүнден ону көрүп болур. Ротшильд, Рокфеллерниң өг-бүле бизнезин шупту дыңнаан. Россияның төөгүзүнде садыгжылар Морозовтар, Елисеевтер, үлетпүржү Демидовтарның династиязының ады элээн нептереңгей.  

 Россия болгаш Тываның амгы төөгүзүнде салгал дамчаан езу-чаңчылдар амдыызында ховар. Өг-бүлениң ниити херээ болур тараачын-арат ажыл-агыйларынга киржилгени өг-бүле бизнези деп чугаалап болур-ла. Ындыг болзажок, ажы-төлү ада-иезиниң оон-даа өске бизнезинге сонуургалдыг, алызында ону уламчылап, салгалдарынче дамчыдар күзелдиг өг-бүлелер бар деп идегээр бис. 

 Боттарыңарның өг-бүлеңер бизнезиниң дугайында чураан, тырттырган чуруктарыңарны, таныштырылгаңарны, чечен чугааңарны азы ролигиңерни «Ачам, авам, мен – бизнес өг-бүле бис!» деп конкурсче чоруткаш, шаңналды алыр, азы Москва хоорайга регионнар аразының конкурузунга киржир арганы эрттирбеңер.  

 E-mail: tpptyva@mail.ru. Тел. 2-18-88. Чагыгларны 2017 чылдың май 22-ге чедир хүлээп алыр. Конкурска киржириниң чуруму болгаш чагыг киирериниң майыы бо арында: http://tuva.tpprf.ru/ru/news/189225/