Тываның пенсионерлери Бүгү-россияның компьютерге хөй талалыг VII маргылдаазынга киржир

 Май 25-тен 27-ге чедир Санкт-Петербург хоорайга Бүгү-россияның компьютерниң хөй талалыг VII чемпионадының түңнел мөөрейинге Тываның пенсионерлери киржир. 

 ТР-ниң Күш-ажыл болгаш социал политика яамызының регион үе-чадазынга эрттирген чемпионадының тиилекчилери аңаа төлээлээр. Бии-Хем кожуундан Светлана Намчилова эгелеп чоруур ажыглакчыларның эң тергиини деп үнелеткеш, Кызыл чурттуг Чечекмаа Ондар компьютерни билир кижилерниң аразындан тергиини деп санаткаш, маргылдаага киржир болган.  

 Кызылдың хоочуннар болгаш инвалидтер интернадынга республика маргылдаазын ийи чадага эрттирген. Бирги чадада киржикчилер «Төрээн черинге экологтуг аян-чорук» деп темага мультимедийлиг таныштырылганы көргүскен. Ооң түңнели-биле 10 кижини илереткеш, компьютерни теория болгаш практика кырында ажыглаарын шылгаан.

 Компьютер билиглеринге өөредир программа-биле 2014 чылдан бээр Тывада ажылдавайн турар пенсионерлерни болгаш инвалидтерни хаара туткан. Республиканың эрге-чагыргазы социал хандырылга албан черлерин интернетке кожарын организастаарынга, компьютерлер-биле дерииринге, улгады берген кижилерни халас компьютер курстарынга өөредиринге чылдың-на 1 млн. рубльди тускайлап турар. 

 Компьютерге хөй талалыг чемпионат – улуг назылыг кижилерни эмнерни онлайн таварыштыр садып, коммунал ачы-дузазын төлеп, эрге-чагырга органнарындан негелде тургузарынга чедир, амгы үениң чурагайлыг гаджеттерин ажыглап билир кылдыр өөредир эптиг арганың бирээзи.