Тываның эрге-чагыргазы эвээш орулгалыг болгаш хөй ажы-төлдүг өг-бүлелерге үлээр картофель үрезинин садып алган

Төлевилелдиң координатору, Өг-бүле болгаш уруглар херектериниң талазы-биле агентилел, ниитизи-биле 33325 кил үрезинни садып алганын дыңнаткан. Садыглаашкынны ойнап алган ийи ажыл-агый – Кызылдан фермер Геннадий Ким кол хандырыкчы болур болза, Красноярск крайның Шушенскоеден сайгарлыкчы Андрей Исаевтен база элээн үрезинни алыр.

  ТР-ниң садып алыышкын адырында керээ системазын таарыштырар яамының специалистери садыглаашкынны котировка чагыы-биле чорутканын дыңнаткан. Керээниң баштайгы өртээнден 51,5 хуу азы чартык миллион ажыг рубль акшаны камнап алган. Төлевилелдиң 1333 чаа киржикчилеринге – эвээш орулгалыг болгаш хөй ажы-төлдүг өг-бүле санынга-ла 25 кил картофель үрезинин тускайлаар. 1143 өг-бүле боттарының участоктарынга, 139-у суму чагыргазының аңгылап берген шөлдеринге, 27-зи хөлезилеп алган черлеринге, 24 өг-бүле төрелдериниң чанынга ногааны тарыырлар. Ол өг-бүлелерде, 18 хар чедир назылыг шупту 4058 уруг бар. 

 645 өг-бүлеге свекла, морковь, согуна үрезиннерин бо чылын база үлээр. Майның башкы хонуктарында үрезиннерни республиканың кожууннарынче тарадыр. «Социал картофель» губернатор төлевилели Тывада үш дугаар чыл боттанып турарын сагындыраал. Ооң сорулгазы - эвээш орулгалыг өг-бүлелерге адрестиг социал дузаны көргүзери, оларның амыдырал-байдалын экижидери.