Тываның Чазаа аныяк специалистерден стажировка эрттирер документилерни хүлээп эгелээн

 35 хар чедир назылыг аныяктар конкурска киришкеш, ТР-ниң Баштыңының Администрациязынга болгаш ТР-ниң Чазааның Аппарадынга, Тыва Республиканың күүсекчи эрге-чагырга органнарынга стажировкалап болур. 

 Тываның Баштыңы Шолбан Кара-оол республиканың Дээди Хуралынга чылдың бээр Айыткалында аныяк специалистерниң стажировказын ажылдап, тодаргай системаны ажыглалга киирери чугула деп демдеглээн. «Төрээн Тывавыска — түңнелдиг ажыл-ишти болгаш аныяктарга күчү-күштү!» документ республикада ажыл-херектерниң байдалын болгаш 2017 чылда иштики политиканы тодараткан. 

 Күрүне албаны болгаш кадрлар курлавырының талазы-биле департамент 2017 чылдың май 14-ке чедир документилерни хүлээп алыр. 35 хар чедир назылыг, дээди эртемниг болгаш Россия Федерациязының күрүне дылдарын билир Россияның хамаатызы конкурска киржип болур. Конкурс комиссиязынче дужаар чугула документилерниң даңзызын бо ссылкадан - gov.tuva.ru/content/2206/ көрүп болур.  

 2016 чылдың күзүн, Тываның Баштыңы аныяктарга 25 хуу квотаны бодунуң чарлыы-биле республика чазаанга быжыглаанын сагындыраал. Ынчан ажык конкурска киржири-биле 133 кижи документилерин дужааган, шилилге чаданы 90 кижи эрткен. 26 кижини курлавырда быжыглаан. Конкурска тиилээн кижилер ТР-ниң Баштыңының Администрациязы болгаш ТР-ниң Чазааның Аппарады, ТР-ниң Экономика яамызы, ТР-ниң Саң-хөө яамызы, ТР-ниң Аныяктар херээ болгаш спорт, ТР-ниң Даштыкы-биле экономиктиг харылзаа агентилели дээн ышкаш, эрге-чагырга органнарында удуртукчу албан-дужаалдарда томуйлаашкынны алган.