Тываның спортчузу Кежик Монгуш Россияның кикбоксинг чемпионадынга 54 килге "алдынны" чаалап алган

 «Грозныйда эртип турар кикбоксинг маргылдаазында чемпион атты Тывадан Кежик Монгуш чаалап алган. Дүүн төп телевидениениң дорт дамчыдылгазында Чечня биле Тывадан ийи спортчунуң солун оюнун дамчытты. Эр-хей! Ачаңның эгелээн оруун төлептиг уламчыла! Езулуг чоргаарал ол!» 

 Чечен республиканың найысылалы Грозныйда кикбоксингиге Россия чемпионадының түңнел оюннары дүүн доозулган. Маргылдааның ажыдыышкынында киржикчилер болгаш көрүкчүлер Санкт-Петербург хоорайга болган терактыга качыгдааннарга сактыышкынның минутазын кылган. 

 Чечен Республиканың бирги Президентизи Ахмат-Хаджи Кадыровка турскааткан маргылдаа Чечняда бир дугаар эртип турар. Чечен Республиканың Президентизи Рамзан Кадыров спортчуларга байырны чедирген. 

 Төнчү оюннарда арткан спортчуларның бедик белеткелдиин демдеглеп, чедиишкиннерни күзээн. Төнчү оюннуң түңнелинде, судьяларның чаңгыс үннүг шиитпири-биле 51 килге Алексей Спирин тиилээн. 54 кил деңзиге тыва кикбоксер Кежик Монгуш бодунуң удурланыкчызын тиилээш, чемпионнаан. 57 килге Бувайсар Пасхаев чурттуң чемпиону болган. «Ахмат» клубтуң төлээзи Тимур Надров 60 килге алдынны чаалап алган, а 75 килге Хасан Халиев тиилелгени эккелген. Василий Солак 81 килге чемпионнаан. 91 килге Арслан Яллыев чурттуң чемпиону атты чаалап алган. Турпал Токаев Россияның чемпиону атка төлептиг болган. 

 Чечнядан кикбоксингиге "Ахмат" клубтуң төлээлери 8 эжеш тулчуушкуннуң 6-зынга киришкен. Оларның 5-жи удурланыкчыларын ойнап алгаш, спортчу организацияның тургустунганындан бээр бир чыл болганынга онза түңнелдерни көргүскен. Маргылдааның шупту чемпионнарынга Чечен Республиканың Президентизи Ахмат-Хаджи Кадыровту чуруп сиилбээн чаа курларны тывыскан. 

 Кикбоксингиге Россия чемпионадынга Тывадан 9 спортчу киришкенин сагындыраал. Амгы үеде Грозныйда 17-18 харлыг элээдилер ортузунда кикбоксингиге Россия маргылдаазы база эртип турар. Ында Тывадан 11 спортчу киржип турар.