Тываның Баштыңынга Тываның күрүне университединиң шериг кафедразының начальнигин таныштырган

 Ол 2017 чылдың апрель 1-ден ажылдап эгелээн. Россияның камгалал сайыды дээди өөредилге чериниң шериг кафедразының начальнигинче ону чоруткан, а өөредилге чериниң ректору ону ук албан-дужаалга томуйлаан.  

 "Тывада келгениңер дээш силерге байыр чедирип тур мен. Ону чедип алыр дээш, дыка үр туржуп келгенивисти билир боор силер. Шериг кафедразын ажыдып алыры – бистиң оолдарывыска шериг белеткелдиг өөредилгени чедип алырынга дыка эки арга. Бодумнуң өөренип турган үелеримде шериг кафедразының ролюн сактып келдим – дайынчы өөредилгелер чамдык шериг кезектеринден безин шыңгыы турган. Үшкү курс соонда шериг албанынче аъттаныптым. Шериг хүлээлгемни старшина эргелиг доосканым - шериг кафедразынга шиңгээдип алганым билиглерниң ачызында деп бодаар мен» - деп, Тываның Баштыңы чугаалаан. Солдатты белеткээринге бир чыл чартык, а курлавырда сержантыга 2 чыл хире үе негеттинер. Шериг кафедразының дыңнакчылары университетти доозуп тура, шериг эргелерни алыр. Ужуражылганың киржикчилери кол мергежилиниң талазы-биле чедиишкинниг өөренип алырынга, ол шериг белеткел хей-аътты улам бедидерин демдеглээн. 

 Бо үеде кафедраның башкылар составын чыып, шериг кафедразының составынче кордап болур ТывКУ-нуң бирги, ийиги курсчуларының ортузунда суртаал ажылын чорудуп турар.  

 "Мотоадыгжы бригадага солдаттар болгаш сержантыларны белеткээр бис. Келир үеде эки чүүлдерни ажыдып алырынга орук ажыттынар. Шериг кафедразынга өөредилгени чедиишкинниг доозар болза, муниципалдыг болгаш күрүнениң хамааты албанынче, кызыгаар шериглеринче тургустунарынга эки салдарлыг дээрзин тайылбырлап тур бис. Чамдык оолдар шериг кафедраның ужур-дузазын чедир билбес, дээди өөредилге черин дооскан соонда албан шериглээр деп бодап турарлар. Ол ындыг эвес. Ол дээрге, конститусчу хүлээлгени күүседиринге чаа арга – университединиң иштинге-ле шериг мергежилди чедип алыры-дыр. А бир эвес шериг оруун шилип алыр болза, керээ-биле албан хүлээлгеже аъттанып болур. Депшилге турар. Ынчангаш тайылбыр ажылын ам-даа идепкейжидер бис» - деп, Олег Калинин чугаалаан.  

 Өөредилге чорудуун – чыскаалырының, планныг кичээлдер, бот-ажыл шактарын хевирлээр ажылдар база эгелээн. Оолдарны хүлээп алган соонда, шериг хепти үлээр.

 Тываның Баштыңы 55-ки мотоадыгжы даг бригадазы-биле сырый ажылдаарын сүмелээн. Университеттиң ректорунуң чоок чыдар шериг кезээнге шериг кафедразын быжыглаар дээн дилээнге округтуң шериг командылакчызы атты салган, ынчангаш кады ажылдажылга хандырттынган деп, Олег Калинин тайылбырлаан.

 Кызылдың чөөн микрорайонунда политехниктиг институттуң эрги оран-савазының бирги каъдынга шериг кафедразы баштайгы үелерде турумчуур. Ында өрээлдерни, шаптараазыннар эртер база чыскаалыр девискээрлерни чаагайжыдар төлевилелдерни Тываның Баштыңынга таныштырган. Университет ол ажылдарда хаара туттунган, а «Дайынчы акы-дуңма» хөй-ниити организациязы улуг дузаны көргүзүп турарын ректор Ольга Хомушку чугаалаан.  

 Тываның Баштыңы Шолбан Кара-оол школа-интернаттың баазазында Республиканың кадет корпузунуң кижизидикчилерин шефке ап, хамааты-патриотчу кижизидилге ажылын чорударын Тываның күрүне университединиң шериг кафедразынга сүмелээн. Регионнуң удуртукчузу шериг кафедразының материал-техниктиг баазазын улгаттырарынга дузалаарын, ол айтырыгны РФ-тиң Камгалал яамызы база өске-даа сонуургалдыг структуралар-биле чугаалажып көөрүн аазаан.  

 Подполковник Олег Калинин Тывага кээр мурнунда Сибирьниң федералдыг университединиң Шериг-инженер институдунга башкылап турган. Шериг албанныгларның салгалы. Олег Калининниң кырган-ачазы – Ада-чурттуң Улуг дайынының киржикчизи. 

 Студентилерниң шериг белеткелиниң географиязын калбартыры-биле, РФ-тиң Камгалал яамызы 2016 чылда В. Вернадский аттыг Крымның федералдыг университединде, Севастопольдуң күрүне университединде, Соңгу Кавказтың федералдыг университединде, Сибирьниң федералдыг университединде база Тываның күрүне университединде 5 шериг кафедразын ажытканын сагындыраал. 

 РФ-тиң Чазааның даргазы Дмитрий Медведев ооң дугайында айтыышкынга атты салган.