Тываның Баштыңы найысылалда Аныяктар ордузунуң тудуун доозарын негээн

 Тываның Баштыңы Шолбан Кара-оол март 16-да, ажыл-албан аайы-биле Москваже чоруур мурнунда, республиканың Тудуг, Аныяктар, Культура яамыларының, Кызыл мэриязының база «Сельстрой» тудуг организациязының удуртукчулары-биле найысылалда Аныяктар ордузунуң тудуун доозар дугайында чугааны кылган. 

 ТСД-биле объектиниң ниити смета өртээ 443,4 млн. рубль. Тудугну тудуп эгелээнден бээр республика бюджединден 234,826 млн. рубльга акшаландырган. Тудугну доозуп, ону ажыглалче кииреринге ам-даа 221,46 млн. рубль херек. 

 2017 чылда регион бюджединиң нарынындан республиканың Тудуг яамызы катап санаашкынны кылгаш, объектини доозар чарыгдалдарны ийи катап эвээжеткен. Иштики инженер четкилери, вентиляция системазы, чырык база чылыг хандырылгазы, канализация, трансформатор подстанциязы, чаагайжыдылганың даштыкы четкилери, оран-саваның иштики шеверлели, эжиктер, шала болгаш өске-даа ажылдарже 128 млн. рубльди санаан. Ресторан биле ХБАБ-ка тускайлаан өрээлдерниң акшаландырыышкынын ап каапкан.  

 Акша-хөреңгини чедиштирери-биле катап анализтээрин, тудуг организациязының бодунуң азы чээли акшазы-биле тудугну доозарының аргазын тыварын Тудуг яамызынга республиканың Баштыңы саналдаан.