Тывада февраль 1-ден школаже уруглар бижидилгези эгелээн
18.01.2017
Тываның школаларында бирги классче уругларын бижидеринге ада-иелерден билдириишкиннерни хүлээп алырынга белеткел эгелээн. Хоойлужудулгада өскерилгелерни кииргени-биле кампания ийи чадага эрттерин ТР-ниң Өөредилге яамызы дыңнаткан.
Тодаргай школа бүрүзүнүң девискээринде быжыглаттынган азы чурттап турар уругларны февраль 1-ден июнь 30-ге чедир школалар хүлээр. Чурттап турар черинде быжыглаттынмаан уругларны, бир эвес хостуг олуттар бар болза, июль 1-ден сентябрь 5-ке чедир киирип ап болур.
Ада-иелер төлүн бирги классче киирериниң дугайында билдириишкинни боттары бижиир ийикпе, азы почта дамчыштыр, чок болза электроннуг почта-биле херек документилерни чорудар. Интернет-биле билдириишкинни киирер дизе, https://17.gosuslugi.ru/pgu/service/17000000001702370.. деп ссылка-биле күрүне ачы-дузаларының порталынга бүрүткеткеш, школаны шилээш, системаның саналдааны майыкты долдурар. Билдириишкинге бодунуң паспортунуң, уругнуң төрүттүнген дугайында херечилелиниң хоолгаларын, девискээрде быжыглаттынганын бүрүткээн документизин кожар. Ада-иелерниң күзели-биле өске документилерни база киирип болур, чижээ уругнуң кадыкшыл байдалының дугайында шынзыдылганы.
Школаның администрациязы билдириишкинни 7 хонук дургузунда сайгарып көргеш, школаже хүлээп алганының азы ойталап турарының дугайында шиитпирни үндүрер. Школаже уругну чүгле чаңгыс чылдагаан-биле – хостуг олуттар чок болза хүлээвейн барып болур. Уругну хүлээп алганының дугайында дыңнадыгны школаның дыңнадыг булуңунга азар, азы билдириишкинни харылзааның кандыг шугуму-биле кииргенил, бодунга ынчаар харыылап бээр.
Возврат к списку
|