Тываның аңчылары малчыннарның бөрүден когаралын эвээжеткен

 Тывага чаа чылдың бүдүүзүнде болгаш дыштаныр хүннерде мал өстүрүп турар ажы-агыйларга айыыл чок болур кылдыр, бөрүлерниң санын хөлүн эрттир көвүдетпейн өйлеп таарыштырар хемчеглерни ап, аңчыларның күжү-биле бөрүлерге удур 130 чедир аглаашкынны организастаан. 

 Тываның Чазааның айтыышкыны-биле чылдың-на чорудуп турар бо кампанияның организакчызы болгаш башкарыкчызы ТР-ниң Дириг амытаннар болгаш сугнуң биологтуг курлавырларын камгалаар талазы-биле күрүне комитеди болган. Ук күрүне албан чериниң удуртукчузу Геннадий Кууларның дыңнатканы-биле алырга, малчыннарга дыш чок онза дүвүренчиг байдалдыг девискээрлерге ийи неделя дургузунда аглаашкынны чоруткан түңнелинде 35 бөрүнү узуткаан. 

 Ылаңгыя Улуг-Хем кожууннуң девискээринге бөрүлерге удур аңнаашкыннар чедиишкинниг болганын демдеглээн. Бо кожууннуң аңчылары 12 үнүүшкүннүң түңнелинде 11 бөрүнү, а Чөөн-Хемчик биле Өвүрнүң аңчылары 7 биле 4 кокайны узуткаан. 

 Аңныыр ажыл-агыйын харыылап турар албан чериниң медээзи-биле алырга, республика девискээринде бөрүлерниң саны доктааттынган норма-чижектен 1,6 катап ажып турар. Эртемденнерниң санап турары-биле алырга, бөрүлерниң ниити саны 800-тен көвүдевес болза, ниитиниң малынга айыыл чок болур. А Тывада амгы үеде бөрүлерниң саны 1,5 муң чедип турар. Бо хире хөй араатаннар чыл дургузунда мал ажы-агыйынга ортумаа-биле 30-40 млн. рубль чедир когаралды таварыштырып болур дээрзин санап түңнээн.