Чингис Чамыян – Россияның чыынды командазында

Бай-Тайга кожуннуң Тээли сумузунуң № 13 профессионал училищезиниң сургуулу Чингис Чамыян ажылчын мергежилдер мастерлериниң аразынга делегей чемпионадынга Тываның адын камгалап, Россияның национал чыынды командазынче кирген.

Ол национал чыынды команданың составынче Россияның бирги чери дээш киришкен түңнелдери-биле кирер эргени чаалап алган. Бай-Тайганың даш чонукчузу хүлер медальды даш болбаазырадыкчыларының маргылдаазынга төлептии-биле алган.

Чемпионат 2013 чылдың июль айда Лейпцигге (Германия) болур. Россияның командазынче 18 региондан 34 киржикчи 14 аңгы адырга кирип турар. WorldSkills Russia-2013 Национал чемпионат Самара облазының Тольятти хоорайынга болуп эрткен турган. Аңаа Россия Федерациязының 44 регионундан аныяк специалистер 24 адырга боттарының профессионал мергежилин бараалгаткан. Gov.tuva.ru-нуң дыңнатканы-биле алырга, Чингис-биле кады Тывадан Россия чергелиг шилилге маргылдаага республиканың профессионал училищелеринден 4 студент киришкеш, бедик көргүзүглерни көргүскен.

«Парикмахер ажыл» деп адырга «Тиилелгеже чүткүл дээш» деп тускай сертификат-биле Кызылдың № 1 профессионал училищезиниң студентизи Саяна Балдан шаңнаткан. Тываның тудуг техникумунуң студентизи Григорий Чалзып «Каңнаашкын» деп адырга идепкейлиг киржикчи деп демдеглеттирген, а Кызылдың № 11 профессионал училищезиниң студентилери Алдынай Ооржак биле Чойгана Монгуш «Хептиң дизайны» деп адырга сертификатты ап, Нижний Новгород хоорайга улаштыр өөренири-биле чалаттырган.

WorldSkills International (WSI) – бүгү-делегей шимчээшкини, ооң кол сорулгазы – ажылчын мергежилдерни нептередири, бүдүн делегейге профессионал белеткелдиң болгаш квалификациязының стандарттарын болгаш байдалын бедидери. Россия WorldSkills International бүгү-делегей организациязының кежигүнү кылдыр 2012 чылда кирген. Делегейниң 61 чуртун каттыштырып турар WSI ол ышкаш ажылчын мергежилдер талазы-биле делегей чергелиг чемпионаттарын эрттирери-биле билдингир.