Тыва эки турачыларга – «ЧЕТТИРДИВИС»

Май 20-де, Арат шөлүнге, Ада-чурттуң Улуг дайынынче тыва эки турачыларның чорутканының 70 чылынга тураскааткан аныяктарның массалыг чыыжы болуп эрткен. Аңаа аныяктар «ЧЕТТИРДИВИС» деп сөстү көргүзүп чыскаалган.

Массалыг хемчегге шупту күзелдиг улус киришкен. Кызылдың мэриязының аныяктар болгаш спорт херектериниң талазы-биле эргелелдиң кол специализи Сылдыс Ондарның дыңнатканы-биле, шупту ортумак, эге болгаш дээди өөредилге албан черлеринче баш бурунгаар хемчегге киржири-биле чагааларны тараткан турган.

Кызылдың өөредилге албан чери бүрүзү жеребьевка езугаар «четтирдивис» деп сөстүң бир үжүүн чыскаалга тургузуп көргүзери-биле тырткан. Киржикчилер «ЧЕТТИРДИВИС» деп сөстү чыскаалып тургускан соонда, массалыг танцы-самга киришкен. Танцы таварыштыр аныяктар тыва эки турачыларга Ада-чурттуң Улуг дайынынга тиилелге дээш киирген улуг үлүг-хуузу дээш өөрүп четтиргенин илереткен. Тураскаал кылдыр массалыг аныяктар чыыжын Тываның Национал театрының кырындан чурукка болгаш видеога тырттырган.