Кызылдың аэропортунда ужудуп-хондурар шөлдү эде чаартыр ажылдар уламчылавышаан

 Ужудуп-хондурар шөлдүң асфальт-бетон шывыын шывар ажылдар агаарның сооп келгени-биле түр када соксаан-даа болза, келир чылдың тудуг ажылдарынга белеткелдер уламчылавышаан.

  Бо хүннерде аэропорт комплекизинде тудуг материалдарын сөөртүрү уламчылавышаан. Чыл төнчүзүнге чедир ам-даа 3 муң тонна сай-довуракты дажып эккээри планнаттынган. Ужудуп үнер шөлдүң шывыынга хөй каът, тускай холуксаа херек. Оон аңгыда чырык кабельдерин, суг системазын, сигнализация, чырык, навигация болгаш өске-даа инфраструктура четкилерин шөер аңгы-аңгы хемчээлдиг хоорзаларны часка дээр эккеп алыр. 

 Кызылдың аэропорт комплекизиниң ужудуп-хондурар шөлүн чаартыр талазы-биле төлевилелдиң күүседикчизи, «Сибмост» ААН-ның удуртукчузу Сергей Никонов төлевилел чаа технологияларны ажыглап, агаар-бойдустуң байдалынга даянып, шупту ажылдарны кылганын чугаалаан: 

 «Амгы үеде Россияда сөөлгү эртем ажылдарынга үндезилээн, эң-не чаа дериг-херкселдер-дир бо. Төлевилел планында көрдүнген материалдарны ажыглаар, кандыг-даа хажыдыышкын турбас».  

 Ужуп-хондурар шөлдү эде чаартыр төлевилелдиң боттаныышкынының үезинде, план езугаар 2700 метр шөлдү чаартып тудар. Амгы үеде 1450 метр черде шывыгны чаткан, Новосибирск, Красноярск, Иркутсктан ужудукчулар ажылдың шынарынга «тергиин» деп үнелелди берген. 

 «Кызылдың аэропорту» федералдыг казна бүдүрүлгезиниң директору Виктор Выборный мынча деп чугаалаан:  

 «Шупту кылдынган ажылдың шынары, объектини дужаап, ажыглалче хүлээп ап турда, билдинер болгай. Бөгүн мында ужуп кээп турар ужудукчулар чаа дилиндектиң шынары улуг хоорайларның аэропорттарындан дудак чок-тур деп санап турарлар. Тудуг ажылдарының шынарын хүн бүрүде чиңгине тудуг организациязының тудугга контроль албаны хынап, херек апарза лабораторлуг анализтерни база кылып турар».  

 2016-2017 чылдарда ужудуп-хондурар шөлдү чаартырынга ниитизи-биле 1 млрд. 050 млн. рубль акша-хөреңги көрдүнген. Бо чылын тускайлаан 703 млн. рубль акшаның 570 млн-и шиңгээттинген, а арткан саң-хөөнү келир чылын шиңгээдир. Росавиация-биле ол айтырыгны шиитпирлээн.  

 «Россияның транспорт системазын хөгжүдери (2010-2015 чылдарда)» федералдыг тускай сорулгалыг программа-биле «Кызыл хоорайда аэропорт комплекизин эде чаартыры» инвестиция төлевилели боттанып турарын сагындыраал. Төлевилелдиң ниити өртээ – 3,3 миллиард рубль. Ооң иштинде республика бюджединден аэропорт комплекизиниң объектилерин, УХШ-ти чаартынга дээш 218,5 млн. рубльди база киириштирген. 

 "Кызыл" аэропортун чаартыр төлевилел чаңгыс стратегтиг сорулгалыг – делегей чергелиг кылдыр ооң эрге-байдалын бедидери деп, Тываның Баштыңы Шолбан Кара-оол демдеглээн.