55-КИ АҢГЫ МОТО-АДЫГЖЫ ШЕРИГ БРИГАДАЗЫНЫҢ ШЕРИГ ТЕХНИКАЗЫ ДОКТААМАЛ ТУРАР ЧЕРИ – КЫЗЫЛДА КЭЭП ЭГЕЛЭЭН

 Төп шериг округунуң даг-адыгжы бригадазының кезээниң «Тигр» куяк автомобильдери база куяк транспортерлери армейжи авиацияның вертолеттарының үделгези-биле Сибирьни таварты Кызылда шериг хоорайжыгажында чедип келген. 

 Иркутск облазының Нижнеудинскиден шимчеп үнген шериг техника эшалону баштайгы 1000 километрни демир-орук-биле, оон Усинск оруу-биле бодунуң төнчү оруун эрткен. 60 санныг шериг техниказы – БТР, «Уралдар» база «Тигрлер» Танзыбей суурга дүн чарып алгаш, Буйба арттын ажып, ноябрь 24-те Кызылда келген.  

 Даг-ажыгжы бригаданың бирги эшалону ноябрь 22-де Кызылда келгенин сагындыраал. Ийи хире хонук эрткенде шериг техниканың чамдыызы келген. Ноябрь 27-ге чедир шупту көжүп келир.  

 "Декабрь 1-де чаа өөредилге чылы эгелээр. Албан хүлээлгениң чаа черинге, бистиң солдаттарывыстың төрээн черинге тыва эки турачыларның, бистиң дайынчы тугувустуң, төп шериг округунуң алдар адын баксыратпас бис дээрзинге бүзүрээр мен» - деп, 55-ки даг-адыгжы бригаданың командири, генерал-майор Андрей Хоптяр илеткээн. 

 Марш берге агаар-бойдус байдалында онза болуушкуннар чок келген. Кызылга шериглерни Тываның Чазааның Даргазының оралакчызының хүлээлгезин күүседип турар Артур Монгал, шериг албанныгларның кадайлары, ажы-төлү болгаш чоок кижилери уткуп алган. Эргим кижилерин оода ырактан көрүп алыр идегелдиг уткуп келгеннери бо. 

 Шериг хоорайжыгашта албан хүлээлге эрттирип турар ачавысты дыка манап тур бис» - деп, Аюжана Ондар чугаалаан.  

 Неделя төнчүзүнге чедир шупту шериг албанныглар болгаш техника доктаамал турар черинге көжүп кээр.