Тывада чаа школа тудуунга федералдыг бюджеттен немелде акша-хөреңгини тускайлаан

 Тыва Республикада «Спутник» микрорайонунуң 1-ги кварталынга 825 олуттуг чаа школаны 2016 чылда тудары планнаттынган. 

  Россия Федерациязының Чазаа РФ-тиң субъектилеринге чаа школалар тударынга субсидияны аңгылаар дугайында шиитпирни бо чылдың апрельде хүлээп алган. Ол күрүне программазында Тывага школа тударынга 623 млн. рубльди тускайлаан.

  Тыва Республиканың Баштыңы Ш.В. Кара-оол саң-хөө санаашкыннарын кылгаш, республикага аңгылаар субсидияның хемчээлин көвүдедип бээриниң дугайында дилегни Россия Федерациязының Президентизи В.В. Путинге киирген. Чурттуң Президентизиниң даалгазы-биле, федералдыг чазак регион баштыңының дилээн хандырар шиитпирни хүлээп алган. 2016 чылдың июль 13-те РФ-тиң Чазааның даргазы Д.А. Медведев Тывага школа тудуунуң субсидиязынга немей 59 млн. рубльди аңгылаар айтыышкынга атты салган.